काठमाडौँ — दुई महिनाअघि सप्तरीको महादेवा गाउँपालिका–१ सोनरा टोलका २५ वर्षीय दिपककुमार यादवको घरमा बेग्लै उत्साह थियो । आफन्तीहरुको भेला अनि भोजको रमाइलो । तर आइतबार यही घरमा बेग्लै कलङमलङ थियो । बेग्लै सन्नाटा थियो ।

दीपककी २१ वर्षीया पत्नी दीपाकुमारी मृत्यु भएको खबर एकैछिनमा टोलभरि फैलिएको थियो । चार बिघाजती जमिन भएका र करारमा सव-ओभरसियरको पदमा काम गरिरहेका दीपक र उनका बाबु परशुराम यादव नै दीपाको मृत्युमा जिम्मेवार भएको स्थानीयहरु बताइरहेका छन् । स्थानीय र दीपाका परिवारको सदस्यहरुको भनाइ छ, उनीहरुले बिहेलगत्तै गालीगलौज गर्दै थप दाइजो ल्याउन तनाव दिँदै आएका थिए । 

मृतकका परिवारजनका अनुसार दिपकले शुक्रबार दिपाकी भाउजु सुजितालाई फोन गरेर दाइजोका विषयमा कुरा गरेका थिए । ज्वाइँ रिसाएको कुरा थाह पाएपछि सुजिताले पटकपटक फन गरेर दिपाको खबर बुझ्ने प्रयास गरेकी थिइन् । तर दिपकको फोन उठेन् । सुजिताले भनिन्, 'राति अबेरसम्म फोन गर्दा पनि उठेन् ।'

शनिबार बिहान सुजिताले दिपाको खबर बुझ्न सोनरा टोलका स्थानीयलाई फोन गरिन् । दिपकका छिमेकीहरुले विवाहपछि झै–झगडा हुँदै आएको विषय बताए । दिउँसो दीपाका ठूलो बुवा भगवतीप्रसादसहितले सोनरा जाने तयारी गर्दै गर्दा उनीहरुले खबर पाए, दीपालाई अस्पताल लगेको छ । त्यसपछि उनीहरु हान्निएर अस्पताल पुगे । त्यही पुगेपछि थाह पाए दीपाको मृत्यु भइसकेको छ । 

अस्पतालका अनुसार दीपालाई अस्पताल ल्याउनुअघि नै मृत्यु भइसकेको थियो । अस्पतालले नै खबर गरेपछि जिल्ला प्रहरी कार्यालयबाट प्रहरी टोली अस्पताल पुगेको थियो । अनुसन्धान टोलीले दीपाको शरीरको विभिन्न भागमा चोट र घाँटीमा पनि निलडाम देखिएर घटना शंकास्पद लागेपछि दिपक र ससुरा परशुरामलाई नियन्त्रणमा लिएर अनुसन्धान अघि बढाएको छ ।