काठमाडौँ — नेकपा (एकीकृत समाजवादी) का अध्यक्ष माधवकुमार नेपालले पतञ्जलि जग्गा प्रकरणमा आफूमाथि बिना कारण मुद्दा लगाइएको बताएका छन्। नेपालको कानुनले हदबन्दी छुटलाई नियमन गर्ने सम्बन्धी विशेष व्यवस्था गरेको उल्लेख गरेका छन्। 

शनिबार काठमाडौँमा आयोजित एक कार्यक्रमलाई सम्बोधन गर्दै उनले हदबन्दीभन्दा बढी जग्गा दिने काम गरेर र दिएको भन्दा बढी जग्गा बिक्री गर्न दिने काम गरेर बेठिक गरेको भन्दै मुद्दा लगाइएको बताएका हुन्।

उनले नेपाल सरकारले सूचित आदेश बमोजिम हदबन्दीको जग्गा राख्न दिन स्वीकृति दिन सक्ने र स्वीकृति दिँदा आवश्यक सर्तहरू तोक्न सक्ने व्यवस्था गरेको बताएका छन्। हदबन्दीभन्दा बढी जग्गा राख्न दिने अधिकार नेपाल सरकारसँग रहेको उनको भनाइ छ।

नेपालले भने, ‘अहिले ममाथि एउटा मुद्दा चलाइएको छ। मुद्दा के छ त्यहाँ। मुद्दामा ४ वटा कुरा छन्। हदबन्दीभन्दा बढी जग्गा दिने काम गरेर र दिएको भन्दा बढी जग्गा बिक्री गर्न दिने काम गरेर बेठिक भयो भनिएको छ। सरकारी र सार्वजनिक सम्पत्ति हिनामिना र हानी नोक्सानी गर्ने काम भयो। यसरी हिनामिना र हानी नोक्सानी गरेर भ्रष्टाचारको काम भयो। हदबन्दीभन्दा बढी जग्गा बिक्री गर्न दिन पाइन्छ कि पाइँदैन, कानुनले के भन्छ? हदबन्दी छुटलाई नियमन गर्ने सम्बन्धी विशेष व्यवस्था रहेको छ। कसैले स्वीकृति नलिईकन किनेको रहेछ भने पनि नियमन गर्न सकिन्छ। नेपाल सरकारले सूचित आदेश बमोजिम हदबन्दीको जग्गा राख्न दिन स्वीकृति दिन सक्छ। स्वीकृति दिँदा आवश्यक सर्तहरू तोक्न सक्छ। अर्थात् हदबन्दीभन्दा बढी जग्गा राख्न दिने अधिकार नेपाल सरकारसँग छ।'