पर्सा — झाडापखाला तथा हैजाको प्रकोप फैलिएको पर्सामा वीरगन्ज महानगर क्षेत्रमा हैजा संक्रमणको दर स्थिर रहेको छ। बिहीबार साँझ ६ बजेदेखि शुक्रबार बिहान ११ बजे सम्मको १७ घण्टाको अवधिमा यहाँ हैजा पोजेटिभको संख्या बढेको छैन। बिहीबार साँझ हैजा पोजेटिभको संख्या १ सय ४३ थियो भने १६ घण्टा पछि पनि हैजा पोजेटिभको संख्या एउटा पनि थपिएको छैन।

वीरगन्ज महानगरपालिकाको कार्यालयले सार्वजनिक गरेको पछिल्लो तथ्याङ्क अनुसार, वीरगन्ज महानगर क्षेत्रमा मात्रै हैजा संक्रमितको संख्या १ सय ४३ पुगेको हो। तीमध्ये ६८ जना यहाँस्थित विभिन्न अस्पतालमा उपचाररत छन्। कूल संक्रमितमध्ये ७५ डिस्चार्ज भइसकेका छन्। उता पोखरियामा पनि ९ हैजा संक्रमित पुष्टि भइसकेका छन्। यसरी वीरगन्ज र पोखरियामा समेत गरी पर्सा जिल्लामा कूल हैजा संक्रमितको संख्या १ सय ५२ पुगेको छ।

हालसम्म वीरगन्ज महानगर र पोखरिया नगरपालिकामा झाडापखाला र हैजाका ६ सय ७६ बिरामी अस्पतालमा भर्ना भएकोमा ४ सय ४७ डिस्चार्ज भएका छन् भने संक्रमित सहित २ सय २८ उपचाररत छन्।

जिल्ला स्वास्थ्य संकट व्यवस्थापन समितिका प्रवक्ता सुमनचन्द्र ठाकुरका अनुसार, हालसम्म भएको हैजाको पुष्टि आरडीटी परीक्षणबाट भएको हो। संक्रमित पुष्टि भएकाहरू अधिकांश वीरगन्ज महानगरपालिका वडा नं. ३, ११, १२, १३ र १६ का हुन्।