काठमाडौँ — पत्रकारले आफूखुसी विज्ञापन प्रकाशन गरेर गाउँपालिकासँग रकम मागेको पाइएको छ । 'नुवाकोट एक्सप्रेस' नामक अनलाइन सञ्चारमाध्यमले नुवाकोटको पञ्चकन्या गाउँपालिकाको अनुमतिबिना नै विज्ञापन छापेर अवैध रुपमा बिल पेस गरेको पाइएको हो ।

पञ्चकन्या गाउँपालिकाका प्रमुख प्रशासकीय अधिकृत हिराधन राईका अनुसार नुवाकोट एक्सप्रेसले गत जेठ २९ गते ५ लाख रुपैयाँको बिल पेस गरेका हुन् । नुवाकोट एक्सप्रेसका सम्पादक/प्रकाशक हुन्, उमेशप्रसाद खनाल ।  

‘हामीले उहाँलाई विज्ञापन प्रकाशन गर पनि भनेका होइनौं । उहाँले यसै छाप्नुभएछ,’ प्रमुख प्रशासकीय अधिकृत राईले भने, ‘भन्दै नभनेको विषयमा एक्कासी ५ लाखको बिल आयो । त्यो कसरी भुक्तानी गर्न मिल्छ ?’

यही विषयलाई लिएर नेपाल पत्रकार महासंघ नुवाकोट शाखाले पनि विज्ञप्ति निकालेको छ । विज्ञप्तिमा नुवाकोट एक्सप्रेसले आधारहिन भुक्तानी माग गरेको उल्लेख छ । महासंघ नुवाकोटका अध्यक्ष नवराज सुवेदीका अनुसार नुवाकोट एक्सप्रेसले समाचारलाई बार्गेनिङको माध्यम बनाएको बताए । उनले भने, ‘पत्रकारले अनुमति बिना र विज्ञापन नै प्रकाशित नगरी भुक्तानी माग्नु गर्नु गलत हो । त्यहीमाथि उहाँले पान बिलमा ५ लाख रुपैयाँको माग गर्नुभएको रहेछ । त्यसैले हामीले त्यस्तो कार्यको विरोध गर्दै विज्ञप्ति निकालेका हौं ।’