काठमाडौँ — उपप्रधान तथा सहरी विकासमन्त्री प्रकाशमान सिंहले मध्यबानेश्वरमा नवनिर्मित कविर आश्रम सत्संग ट्रष्ट नेपालको भवन उद्घाटन गरेका छन् । बिहीबार भवन उद्घाटन गर्दै मन्त्री सिंहले आश्रम सत्संग गर्ने स्थानका रुपमा निर्माण भएको बताए ।

समाजका विकृति–विसंगति र अनावश्यक रूपमा भड्किने मनलाई नियन्त्रण गर्ने प्रभावकारी माध्यम सत्संग रहेको भन्दै उनले सत्संगतले मनलाई एकाग्र र संयमित बनाउन मद्दत गर्ने बताए । कविर आश्रमले समाजका नकारात्मक पक्षलाई नियन्त्रण गर्न पनि सघाउने उनको भनाइ थियो ।

बागमती प्रदेशसभा सदस्य तथा पूर्वमन्त्री दीपेन्द्र श्रेष्ठले धार्मिक र सांस्कृतिक महत्व बोकेका पूर्वाधार निर्माणलाई प्रदेश सरकारले प्राथमिकता दिएको उल्लेख गरे । सम्पदा जोगाउने दायित्वका रुपमा सरकारले आश्रम निर्माणमा पहल गरेको उनले बताए । 'कविर आश्रम सन्त, महागुरुका लागि सत्संग गर्न महत्वपूर्ण स्थल हो,' उनले भने, 'सत्संगलाई गहिराइमा गएर बुझ्दा यसको महत्व धेरै छ, सत्य र असत्य बुझ्नु नै सत्संग हो ।'