नेपाल प्रहरी भन्छ : 'नेपालको बाटो हुँदै छिरेको भन्ने खबरमा कुनै सत्यता छैन । त्यताका सञ्चार माध्यमहरूले लेखेका मात्र हुन् ।'
What you should know
काठमाडौँ — नेपालको बाटो हुँदै तीन जना आतंकवादी छिरेको भन्दै बिहार प्रहरीले 'हाई अलर्ट' जारी गरेको छ । पाकिस्तानबाट तीन जना आतंकवादी काठमाडौं हुँदै बिहार छिरेको बिहार प्रहरी मुख्यालयले जनाएको छ ।
एनडीटीभीका अनुसार नेपाल हुँदै बिहार छिर्नेमा हसनैन अली-रावलपिन्डी, आदिल हुसैन-उमरकोट र मोहम्मद उस्मान-बहावलपुर रहेका छन् । बिहार प्रहरीले यी तीनै जना अगस्टको दोस्रो हप्ता काठमाडौं आएको र गत हप्ता बिहार छिरेको दाबी गरेको छ ।
इन्डियन एक्सप्रेसका अनुसार तीनै जना जैश-ए-मोहम्मदसँग आबद्ध रहेका छन् । उनीहरू बिहारमा आउँदै गरेको विधानसभा चुनाव बिथोल्न आएको समेत भारतीय सञ्चारमाध्यमहरूले विश्लेषण गरेका छन् । पूर्णियाका डीआईजी प्रमोदकुमार मण्डलले पूर्णिया, कटिहार, अररिया र किशनगन्जका एसपीलाई 'हाई अलर्ट' मा रहन निर्देशन दिएको इन्डियन एक्सप्रेसमा खबर छ । यी सबै जिल्ला नेपालका सीमावर्ती जिल्ला हुन् ।
के भन्छ नेपाल प्रहरी ?
भारतीय प्रहरीले काठमाडौं हुँदै बिहार छिरेको दाबी गरे पनि नेपाल प्रहरीले भने उक्त खबरमा कुनै सत्यता नभएको बताएको छ । कान्तिपुरसँगको कुराकानीमा नेपाल प्रहरीका केन्द्रीय प्रवक्ता प्रहरी नायब महानिरीक्षक विनोद घिमिरे भन्छन्, 'नेपालको बाटो हुँदै छिरेको भन्ने खबरमा कुनै सत्यता छैन । त्यताका सञ्चार माध्यमहरूले लेखेका मात्र हुन् ।'
यद्यपि नेपालसँग सीमा जोडिएको भारतीय राज्य बिहारमा विधानसभा चुनाव आएकाले दुवै देशका सुरक्षा संयन्त्रको नियमित बैठक र सूचना आदान-प्रदान भने जारी रहेको प्रवक्ता घिमिरेले बताए ।
उनले अगाडि भने, 'छिमेकी राष्ट्रको सुरक्षा संवेदनशीलतासम्बन्धी विषयमा हामी सतर्क छौं । बिहारमा चुनाव आएकाले पनि सुरक्षा संवेदनशीलता हुने नै भयो । तर नेपाल आएको भन्ने खबरमा कुनै सत्यता छैन ।'
बिहारमा चुनावको मिति घोषणा नभए पनि भारतको निर्वाचन आयोगले आगामी नोभेम्बरका लागि तोक्न सक्ने भारतीय सञ्चारमाध्यमहरूले जनाएका छन् ।
