उखु किसानलाई ७० रुपैयाँ अनुदान दिने भनिए पनि सरकारले ३५ रुपैयाँमा घटाएको भन्दै भट्टराईले सरकारको आलोचना गरेका छन्।
काठमाडौँ — पूर्वप्रधानमन्त्री एवं नेपाल समाजवादी पार्टी (नयाँ शक्ति)का अध्यक्ष बाबुराम भट्टराईले आन्दोलनरत उखु किसानको आन्दोलनलाई समर्थन जनाएका छन् । मंगलबार काठमाडौंको माइतीघर मण्डलमा पुगेर उनले उखु किसानका माग जायज रहेको भन्दै समर्थन जनाएका हुन् ।
उखु किसानलाई दिने भनिएको अनुदान सरकारले एकलौटी निर्णयबाट कटौती गरेको भन्दै भट्टराईले सरकारको आलोचना गरे ।
‘लामो समयको आन्दोलनपछि किसानहरुलाई प्रतिक्विन्टलमा ७० रुपैयाँका दरले किसानहरुलाई अनुदान दिने कुरा भएको थियो । त्यो पनि किसानहरुको ठूलो आन्दोलनको कारणले हो । त्यो घटाएर ३५ रुपैयाँ पुर्याउने अनि त्यो पनि समयमा नदिने अरे । अनि सरकारले एकलौटी गर्न मिल्छ ? यो त किसानहरूमाथि बदमासी र ठगी भएन ?,’ भट्टराईले भने ।
मधेश प्रदेशसहित देशभरका उखु किसानले सरकारले तोकेको प्रतिक्विन्टल ७० रुपैयाँ अनुदान कायम गर्न तथा बक्यौता रकम भुक्तानी गर्न माग गर्दै आन्दोलन गर्दै आएका छन् । आर्थिक वर्ष २०८१/८२ को उखुको भुक्तानी रकम माग गर्दै उनीहरू आन्दोलनमा उत्रिएका हुन् ।
