काठमाडौँ — प्रधानमन्त्री तथा एमाले अध्यक्ष केपी शर्मा ओलीले पूर्वराष्ट्रपति विद्यादेवी भण्डारीले पार्टी एकतामा असहयोग गरेको बताएका छन् । 

पूर्वराष्ट्रपति भण्डारीले एमालेमा सक्रिय हुनका लागि गरेका गतिविधिलाई ओलीले पार्टी एकतामा असहयोगी कदमका रुपमा व्याख्या गरेका छन् । पार्टी केन्द्रीय कार्यालय च्यासलमा शुक्रबार आयोजित कार्यक्रमलाई सम्बोधन गर्दै ओलीले पूर्वराष्ट्रपति भण्डारीका गतिविधिप्रति असन्तुष्टि जनाएका हुन् ।

भण्डारीले राष्ट्रपतिबाट बाहिरिएपछि पार्टीका कार्यकर्तालाई झुक्याएर सदस्यता रसिद काटेको पनि ओलीको भनाइ थियो । 'अहिले पूर्वराष्ट्रपतिको सदस्यता खोसिएको भन्ने आरोपका कुराहरू आएका छन् । खासमा राष्ट्रपति भएपछि उहाँले पार्टी सदस्यता त्याग्नुभएको हो । कर्मचारीलाई झुक्याएर हुँदै नभएको सदस्यता रसिद काट्दैमा कायम हुँदैन । उहाँले बाहिर बाहिर बोल्नुभएको छ,' ओलीले भने, 'पार्टीमा आएर सदस्यता नवीकरण र नयाँ सदस्यताका लागि निवेदन दिनुभएको पनि छैन । पार्टीमा असन्तुष्ट र एकाध जनसंगठनमा हारेकाहरूलाई जम्मा गरेर उहाँले पार्टी एकतामा यसरी असहयोग गर्नुहोला भन्ने हामीले कल्पना पनि गरेका थिएनौँ ।'