प्रलोभनमा पारी किशोरीको डिम्ब निकालेको अभियोगमा दुई निःसन्तान उपचार केन्द्रका सञ्चालकहरुलाई प्रहरीले असार अन्तिम साता काठमाडौंबाट पक्राउ गरी अनुसन्धान अघि बढाएको थियो ।
What you should know
काठमाडौँ — किशोरीलाई आर्थिक प्रलोभनमा पारेर डिम्ब निकालेको अभियोगमा होप फर्टिलिटी एन्ड डाइग्नोस्टिक क्लिनिकका सञ्चालक स्वस्ति शर्मासहित सात जनाविरुद्ध मुद्दा चलाउन प्रहरीले रायसहितको अनुसन्धान प्रतिवेदन जिल्ला सरकारी वकिल कार्यालयलाई बुझाएको छ ।
प्रहरीको केन्द्रीय अनुसन्धान ब्युरो (सीआईबी)ले क्लिनिकका सञ्चालक खड्का र सोही क्लिनिकमा काम गर्ने कर्मचारीसहितलाई प्रतिवादी बनाएर मुद्दा चलाउने रायसहित सरकारी वकिल कार्यालयमा अनुसन्धान प्रतिवेदन बुझाएको हो ।
प्रलोभनमा पारी किशोरीको डिम्ब निकालेको अभियोगमा निःसन्तान उपचार केन्द्र सञ्चालक बबरमहलस्थित होप फर्टिलिटी र महाराजगञ्जस्थित एन्जल फर्टिलिटी क्लिनिकका स्वस्ति शर्मा, असीम अधिकारी र मलिनी चौधरीसहितलाई प्रहरीले असार अन्तिम साता काठमाडौंबाट पक्राउ गरी अनुसन्धान अघि बढाएको थियो ।
आरोपितहरुविरुद्ध बालबालिका सम्बन्धित ऐन २०७५ अनुसार कसुर गरेकामा कैद र जरिवानाको मागदाबीसहित मुद्दा चलाउन राय दिइएको सीआईबीका एसएसपी होविन्द्र बोगटीले जानकारी दिए । डिम्ब निकालिएका किशोरीको स्वास्थ्यमा समस्या देखिएपछि यो विषय प्रहरीसम्म पुगेको थियो । अनुसन्धानका क्रममा दुई किशोरीलाई आर्थिक प्रलोभन दिएर होप फर्टिलिटीका सञ्चालक र कर्मचारी तथा एजेन्टको योजनामा डिम्ब निकालेको तथ्य खुलेको थियो । पीडित दुवै जना किशोरीहरुमा डिम्ब निकालिएपछि महिनावारी नहुने, पेट दुख्नेलगायत समस्या देखिएपछि सीआईबीले अनुसन्धान सुरु गरेकामा क्लिनिकका सञ्चालकसहित कर्मचारी र एजेन्टमार्फत डिम्बको अवैध कारोबार गर्ने गरेको खुलेको हो ।
त्यसपछि दुवै किशोरीको जाहेरीका आधारमा अघि बढेको अनुसन्धानमा ७ जनाको संलग्नता खुलेपछि उनीहरूलाई प्रतिवादी बनाएर मुद्दा चलाउन सीआईबीले रायसहित प्रतिवेदन बुझाएको हो । सरकारी वकिल कार्यालयले यसमा अध्ययन भइरहेको र छिट्टै कसुरअनुसार अभियोग पत्र अदालतमा पुर्याइने जनाएको छ ।
