परराष्ट्र सचिव अमृतबहादुर राईसँग द्विपक्षीय वार्ता गर्नुका साथै प्रधानमन्त्री ओली, परराष्ट्रमन्त्री आरजु राणा देउवासहित उच्च पदस्थ राजनीतिक नेतृत्वसँग भेटघाट हुनेछ।
What you should know
काठमाडौँ — भारतीय विदेश सचिव विक्रम मिस्री दुईदिने नेपाल भ्रमणका लागि आइतबार काठमाडौं आउँदै छन् । परराष्ट्र सचिव अमृतबहादुर राईको निमन्त्रणामा मिस्री औपचारिक भ्रमणका लागि आउन लागेका हुन् । प्रधानमन्त्री केपी शर्मा ओलीको भदौ ३१ मा प्रस्तावित भारत भ्रमणको तयारी छलफलका लागि मिस्रीको नेपाल भ्रमण हुन लागेको हो ।
परराष्ट्र मन्त्रालयले शनिबार विज्ञप्ति जारी गर्दै नेपाल–भारत साझेदारीका विभिन्न पक्ष, कनेक्टिभिटी, विकास सहयोग र आपसी हितका अन्य विषयहरूमा दुई परराष्ट्र सचिवबीच कुराकानी हुने जनाएको छ । मिस्रीले नेपालका उच्च पदस्थ व्यक्तिहरूसँग पनि भेट्ने जनाइएको छ ।
भारतको विदेश मन्त्रालयले पनि शनिबार नै मिस्रीको नेपाल भ्रमणबारे विज्ञप्तिमार्फत जानकारी दिएको छ । भारत र नेपालबीच बलियो मैत्रीपूर्ण सम्बन्ध रहेको भन्दै विज्ञप्तिमा नेपालसँगको सम्बन्धलाई भारतले उच्च प्राथमिकता दिएको उल्लेख छ ।
‘विदेश सचिवको भ्रमणले दुई देशबीचको नियमित उच्चस्तरीय आदानप्रदानको परम्परालाई निरन्तरता दिने र द्विपक्षीय सम्बन्धलाई अझ अघि बढाउने अवसर हुने,’ भारतको विदेश मन्त्रालयद्वारा जारी विज्ञप्तिमा उल्लेख छ । मिस्री आइतबार बिहान ९ बजे भारतीय वायु सेनाको विशेष उडानबाट काठमाडौं ओर्लनेछन् ।
नेपाल भ्रमणका क्रममा मिस्रीले परराष्ट्र सचिव राईसँग द्विपक्षीय वार्ता गर्नुका साथै प्रधानमन्त्री ओली, परराष्ट्रमन्त्री आरजु राणा देउवासहित उच्च पदस्थ राजनीतिक नेतृत्वलाई भेट्ने कार्यक्रम छ । परराष्ट्र स्रोतका अनुसार मिस्रीले भारतीय प्रधानमन्त्री मोदीका तर्फबाट ओलीलाई भारत भ्रमणको औपचारिक निमन्त्रणा हस्तान्तरण गर्नेछन् ।
प्रधानमन्त्री बनेको १४ महिनापछि ओलीको भारत भ्रमण हुन लागेको हो । परराष्ट्रका एक अधिकारीका अनुसार मिस्रीको नेपाल भ्रमण प्रधानमन्त्री ओलीको भारत भ्रमणको आधार तथा माहौल तयार पार्नमा केन्द्रित हुनेछ । विदेश सचिव मिस्रीको काठमाडौंमा हुने भेटवार्ताले प्रधानमन्त्री तहमा कुन–कुन एजेन्डालाई प्रवेश गराउने र हस्ताक्षर हुन सक्ने विषयहरूको प्रारूप तयार पार्ने ती अधिकारीको भनाइ छ ।
भारत भ्रमणका क्रममा मोदी र ओलीबीच यस पटक दिल्लीबाहिर द्विपक्षीय वार्ताको तयारी छ । परराष्ट्र मन्त्रालय स्रोतका अनुसार बोधगयामा दुई प्रधानमन्त्रीबीच औपचारिक भेटवार्ताको तयारी छ । बिहार राज्यको बोधगया सहर बौद्ध धर्मका अनुयायीहरूका लागि पवित्र तीर्थस्थलका रूपमा प्रसिद्ध छ । बुद्धले ज्ञान प्राप्त गरेको स्थलका रूपमा बोधगया चिनिन्छ ।
भारतीय विदेश सचिव मिस्री सोमबार दिल्ली फर्किनेछन् । मिस्री दोस्रो पटक नेपाल भ्रमणमा आउन लागेका हुन् । गत वर्ष साउन २७–२८ मा दुई दिनको भ्रमणका लागि उनी नेपाल आएका थिए ।
