काठमाडौँ — कांग्रेस सांसद सीता मिजारले संविधानले प्रत्याभूत गरेका दलितका मौलिक हकलाई तत्काल प्रभावकारी रूपमा कार्यान्वयन गर्न सरकारको गम्भीर ध्यानाकर्षण गराएकी छन् । बिहीबार प्रतिनिधिसभामा बोल्दै उनले 'इतिहासमा गरिएको कठोर विभेद र राज्य संरक्षित बञ्चितिकरणका कारण दलित र उत्पीडित वर्गका धेरै नागरिकहरू अझै पनि न्यूनतम मौलिक हक उपभोग गर्न नपाएको' धारणा राखेकी हुन्

अधिकांश दलित चरम गरिबी र अभावमा बाँचिरहेको, र विभेदको स्वरूप बदलिँदै गए पनि कायम रहेको उनको भनाइ छ । 'कतै पहिरो गयो, खोला-बाढी आयो, डुबान पर्यो, दुरदराजका गाउँमा आगलागी भयो, महामारी फैलियो भने पहिलो सिकार दलित नै हुने गरेका छन्। आखिर यो अवस्था कहिलेसम्म भोग्नु पर्ने हो?,' उनले प्रश्न गरिन्।