काठमाडौँ — ऊर्जा, जलस्रोत तथा सिँचाइमन्त्री दीपक खड्काले लोडसेडिङ भइरहेको भनी फैलाइएको हल्ला निरर्थक भएको दाबी गरेका छन् ।  प्रतिनिधिसभाको बुधबारको बैठकमा सांसदहरूको मौखिक प्रश्नको जवाफ दिँदै मन्त्री खड्काले यस्तो जिकिर गरेका हुन् । 

मुलुकका केही क्षेत्रबाहेक देशभर विद्युत् आपूर्ति सहज ढंगले भइरहेको उनको भनाइ छ । विद्युत् विस्तार र आपूर्ति गर्ने कुरालाई सरकारले तीव्रताका साथ अगडि बढाइरहेको समेत उनले दाबी गरे । 

सरकारले विद्युत् निर्यातको माध्यमबाट पाँच अर्ब बराबर मुनाफा भइरहेको मन्त्री खड्काले बताए । ‘१७ अर्ब ७२ करोड रुपैयाँ बराबरको विद्युत हामीले निर्यात गरिरहेका छौं भने आयात १२ अर्ब ९२ करोडको गरिराखेका छौं । झन्डै ५ अर्ब रुपैयाँबराबरको मुनाफा हामीले लिइरहेको अवस्था छ,’ उनले भने ।