काठमाडौँ — एमाले सचेतक सुनिता बरालले नेपालमा साइबर सुरक्षा, डिजिटल तथ्यांक लगायतको सुरक्षा राष्ट्रिय समस्या बनेको बताएकी छन् । राष्ट्रिय सुरक्षा मापदण्ड बनाउँदा र निरीक्षण गर्दा संवेदनशील तथ्यांक राष्ट्रिय डेटा सेन्टरमा नै राख्ने बाध्यकारी कानुनी व्यवस्था र संरचना बनाउनुपर्ने सचेतक बरालको भनाइ थियो । 

प्रतिनिधिसभाको बुधबारको बैठकमा सञ्चार तथा सूचना प्रविधिमन्त्री पृथ्वीसुब्बा गुरुङले प्रस्तुत गरेको 'सूचना, प्रविधि तथा साइबर सुरक्षा विधेयक, २०८२ माथि विचार गरियोस्' भन्ने प्रस्तावमाथि धारणा राख्ने क्रममा सचेतक बरालले उक्त सुझाव दिएकी हुन् । 'नेपाल प्रहरी प्रधान कार्यालयबाट २०८२ साउन २७ मा साइबर सुरक्षाबाट बच्न निम्न अनुसारका उपाय अवलम्बन गर्नुहोला भनेर एउटा सार्वजनिक सूचना जारी गरेको थियो । योबाट पनि थाहा हुन्छ, आज राष्ट्रिय समस्या बनिसकेको छ, साइबर सुरक्षाको विषय,' उनले भनिन् ।

सरकारले उपयुक्त समयमा सूचना, प्रविधि तथा साइबर सुरक्षा विधेयक ल्याएको पनि बरालको भनाइ थियो । विधेयकमा सूचना प्रविधि, साइबर सुरक्षा, व्यक्तिगत विवरण र संवेदनशिलताका विभिन्न विषय समेटिएको बताउँदै संसद्‌बाट त्यसलाई अझ बढी परिभाषित गर्नुपर्ने एवं अन्तर्राष्ट्रिय मापदण्डलाई अवलम्बन गर्नुपर्ने बताइन् ।