काठमाडौँ — प्रतिनिधिसभाको कृषि, सहकारी तथा प्राकृतिक स्रोत समितिले हिन्दुकुश हिमालय क्षेत्रमा रहेका देशका सांसदहरूको सम्मेलन आयोजना गर्दैछ । भदौ २ र ३ गते उक्त सम्मेलन हुन लागेको समितिले जनाएको छ ।

हिन्दुकुश हिमालय क्षेत्रमा नेपालसहित पाकिस्तान, बंगलादेश, भुटान, म्यानमार, अफगानिस्तान, चीन र भारत पर्छन् । समितिले अफगानिस्तान बाहेकका देशलाई निमन्त्रणा पठाएको छ । तालिबान नेतृत्वको अफगानिस्तान सरकारलाई नेपालले मान्यता दिई नसकेकाले त्यहाँ निमन्त्रण पठाइएको छैन । समितिका सचिव शिवदत्त बरालले सम्मेलनको तयारी भइरहेको र विभिन्न देशबाट आउने पाहुनहरूको कन्फर्मेसन प्राप्त भइरहेको बताए । पाकिस्तान, बंगलादेश, भुटान र म्यानमारले सम्मेलनमा सहभागी हुनेहरूको नाम पठाइसकेको छ । बंगलादेश र म्यानमारमा हाल संसद् नरहेकाले त्यहाँका सरकारका तर्फबाट सहभागिता रहने छ । 

पाकिस्तान र भुटानबाट त्यहाँको संसदीय समितिबाटै प्रतिनिधित्त्व रहने जानकारी आइसकेको बरालले जानकारी दिए । ती देशहरूबाट १८ जना पाहुनाहरू आउने भएका छन् । भारत र चीनबाट अझैसम्म को–को आउने जानकारी समितिले पाइसकेको छैन । समितिले परराष्ट्र मन्त्रालयको सहयोग लिएर कार्यक्रमलाई अगाडि बढाएको जनाएको छ । 

हिन्दुकुश क्षेत्रमा जैविक विविधताको क्षति, वायु प्रदूषण, तीव्र आर्थिक तथा सामाजिक परिवर्तनले मानव जीवनमा पारेको गम्भीर असरहरू बारे ज्ञान आदान–प्रदान गर्न सम्मेलनको आयोजना गर्ने समितिले गत फागनुमा निर्णय लिएको थियो । अन्तर्राष्ट्रिय एकीकृत पर्वतीय विकास केन्द्र(ईसिमोड)को आर्थिक तथा प्राविधिक सहयोगमा समितिले कार्यक्रमको आयोजना गर्न लागेको हो । कार्यक्रमलाई सफल बनाउन चरणबद्ध छलफल गर्दै आएको समितिले शुक्रबार हिन्दुकुश क्षेत्रमा रहेका देशहरूका नेपालस्थित राजदूतहरूसँग अन्तर्क्रिया समेत राखेको छ ।