मन्त्री अधिकारीले मकै, धान, गहुँसरह कोदोको पनि महत्त्व रहेको बताउँदै यसको विकासमा ध्यान दिनुपर्नेमा जोड दिएका छन्।
काठमाडौँ — कृषि तथा पशुपक्षी विकासमन्त्री रामनाथ अधिकारीले स्वस्थ रहनका लागि कोदोको परिकार एक छाक खान आग्रह गरेका छन् । राष्ट्रिय कोदो दिवसको अवसरमा भक्तपुरको चाँगुनारायणमा शुक्रबार आयोजित कोदो रोपाईं कार्यक्रमलाई सम्बोधन गर्दै कृषिमन्त्री अधिकारीले स्वस्थ रहन कोदोको परिकार खानुपर्ने बताएका हुन् ।
‘हामी स्वस्थ रहने हो भने, हामीले एक छाकमात्रै भए पनि कोदोको परिकार भान्सामा राख्ने व्यवस्था गर्नसक्यौँ भने वास्तवमा स्वस्थ पनि हुन्छौँ । हामीलाई त रोग लागेको होला, अहिले उपचार गर्न सकौँला, तर भावि सन्तति पनि रोगी भएर जन्मिन्छन् । रोग भित्र्याउने काम हुन्छ,’ उनले भने ।
मकै,धान, गहुँ सरह नै कोदो पनि महत्त्वपूर्ण बाली भएकाले यसको पनि त्यत्तिकै विकास गर्न सक्नुपर्ने मन्त्री अधिकारीको भनाइ छ ।
