काठमाडौँ — भारतबाट हराएका भनिएका दुई किशोरी भक्तपुरमा मृत भेटिएका छन् । आफूले डेरा लिएर बस्दै आएको घरमा नै उनीहरू मृत भेटिएका हुन् । मध्यपुर थिमि नगरपालिका-९ सिन्टीटारमा रहेको स्थानीय निरज चक्रधरको दुईतले घरको छेउको भुईंतलामा रहेको छाप्रोमा उनीहरू डेरा गरी बसेका थिए ।

सुर्खेत पञ्चपुरी नगरपालिका-८ का दिदीबहिनी १७ वर्षीया मेनुका कँडेल र १५ वर्षीया सिर्जना कँडेल सोही घरको प्यासेजमा एउटै डोरीले झुन्डिएको अवस्थामा मृत फेला परेका हुन् । काकाको विवाहका लागि बुवाआमासहित सिर्जना नेपाल आएका थिए । नातामा काका पर्ने खगेन्द्र सिग्देलका अनुसार मेनुकाले गत वर्ष सुर्खेतबाटै एसईई दिएकी थिइन् । सिर्जना भने सानैदेखि बुवाआमासहित भारतको मुम्बईमा बस्दै आएकी थिइन् । काकाको विवाहपछि मेनुका पनि परिवारसहित मुम्बई गइन् ।

असार १३ गते एसईईको नतिजा प्रकाशित भएको थियो । सोही दिन बहिनी सिर्जनासहित मेनुका सम्पर्कविहीन भएको आफन्तले जनाएका छन् । मेनुकालाई एसईईमा दुई विषयमा 'ननग्रेड' नतिजा आएको खगेन्द्रले बताए । बुबाआमाले छोरीहरूको खोजीका लागि भारतमा हारगुहार गरिरहेका बेला भक्तपुरमा मृत भेटिएका हुन् ।  नेपाल आएको आशंका गर्दै सुर्खेत प्रहरीमा जानकारी गराए पनि खोजीका लागि चासो नदेखाएको परिवारको आरोप छ । 

पञ्चपुरी नगरपालिका वडा नम्बर ८ का अध्यक्ष दीपककुमार थापाले मेनुका/सिर्जनाका बुवाआमा रोजगारीका लागि ५/६ वर्ष अघिदेखि नै भारतमा रहेको बताए । जिल्ला प्रहरी परिसर भक्तपुरका प्रमुख प्रहरी उपरीक्षक माधव बुढाथोकीले परिवारका सदस्य आएपछि मात्र घटनास्थलको मुचुल्का उठाइने  बताए ।