काठमाडौँ — भोटेकोशीको सहायक ल्हेन्दे खोलामा आएको बाढीले रसुवा नाकास्थित मितेरी पुलसमेत बगाएर अलपत्र परेका २०३ जना नेपालीलाई आज सिन्धुपाल्चोकको तातोपानी नाका भएर नेपाल ल्याउने तयारी गरिएको छ ।

रसुवाका प्रमुख जिल्ला अधिकारी अर्जुन पौडेलका अनुसार रोजगारीका सिलसिलामा गएकाहरु, चालकलगायतका नेपालीलाई बाढीपछि केरुङमा सुरक्षित राखिएको थियो । उनीहरुलाई चिनियाँ सुरक्षाकर्मीसहित २० वटा गाडीमा आजै बिहान केरुङबाट तातोपानी नाकातर्फ ल्याइँदै गरेको जानकारी पौडेलले दिए । 

गत २४ को भोटेकोशीको बाढीका दिन राति रसुवाको मितेरी पुलस्थित तिब्बतर्फ रहेको ७२ जना कन्टेनर चालकलगायतका नेपालीलाई चीनले नै उद्धार गरेर केरुङ लगेको थियो । उनीहरुलाई अहिलेसम्म खानेबस्नेलगायतका सुविधा दिएर राखेको जानकारी रसुवाका प्रजिअ पौडेलले दिए । 

उनीहरुलाई पनि तातोपानी नाकाबाट ल्याउन लागिएको छ । बाढीका दिन उनीहरुमध्ये कतिपय चालक कन्टेनरको छतमा चढेर ज्यान बचाएका थिए ।   

गृहमन्त्री रमेश लेखकले केरुङमा अड्कीएर आउन चाहनेलाई नेपाल ल्याउन तिब्बतको ल्हासास्थित नेपाली वाणिज्य दूतावासलाई समन्वय गर्न निर्देशन दिएका थिए ।

गृह निरन्तर प्रयासपछि ल्हासास्थित वाणिज्यदूत लक्ष्मी निरौलाले केही दिनदेखि चिनियाँ अधिकारीहरुसँग समन्वय गरिरहेका थिए । नेपाल सरकारको अनुरोधमा उनीहरुलाई तातोपानी नाकासम्म ल्याउने सहमति भएको थियो । सहमति अनुसार तिब्बतको न्यालामस्थित विदेश विभागका प्रतिनिधिले नेतृत्व गरेर उनीहरुलाई तातोपानी ल्याउन लागेको सिन्धुपाल्चोकका प्रमुख जिल्ला अधिकारी किरण थापाले जानकारी दिए ।