काठमाडौँ — एमालेले वरिष्ठ उपाध्यक्षसहित पदाधिकारी संख्या घटाउने प्रस्ताव अघि सारेको छ । बिहीबारको सचिवालय बैठकमा उपाध्यक्ष विष्णु पौडेलले पदाधिकारी संख्या घटाउने प्रस्ताव अघि सारेका हुन् ।

पौडेललाई विधान मस्यौदा समिति तयारीको जिम्मा दिइएको छ । एमालेले भदौमा विधान अधिवेशन गर्ने जनाएको छ ।

ललितपुरको गोदावरीमा सम्पन्न एमालेको प्रथम विधान अधिवेशनले पदाधिकारीमा वरिष्ठ उपाध्यक्ष पद थपेको हो । अहिले एमालेमा वरिष्ठ उपाध्यक्ष पदमा ईश्वर पोखरेल रहेका छन् । त्यस्तै एमालेमा ६ जना उपाध्यक्ष छन् ।

उपाध्यक्षको संख्या पनि घटाएर तीनमा झार्ने प्रस्ताव सचिवालयमा बैठकमा पुगेको छ । अहिले रहेको तीन उपमहासचिवको संख्या घटाएर एकमा झारिने प्रस्ताव गरिएको बैठकमा सहभागी एक पदाधिकारीले भने । त्यस्तै सचिव संख्या ७ बाट झारेर ५ बनाइने प्रस्ताव अघि सारिएको छ ।