'मैले त्यस विषयमा यहाँ सुनेको आधारमा के गर्नुपर्छ मैले सार्वजनिक गर्नुपर्ने महसुस भयो भने सार्वजनिक गर्नेछु'
काठमाडौँ — सामान्य प्रशासनमन्त्री राजकुमार गुप्ताले भूमि समस्या समाधान आयोग कास्कीको अध्यक्ष नियुक्ति र मालपोत कार्यालय कास्कीका प्रमुखको सरुवाको सम्बन्धमा घूस संवादमा नाम लिइएका भूमिमन्त्री बलराम अधिकारीले प्रतिनिधिसभामा जवाफ दिएका छन् ।
मन्त्री अधिकारीले आफ्नो नाम लिइएको तर त्यसमा आफू र मातहतका कोही पनि नजोडिएको प्रष्टिकरण दिएका हुन् । माओवादी सांसद माधवप्रसाद सापकोटाले घूस संवादको अडियोबारे प्रश्न गरेका थिए । सापकोटाले मन्त्री अधिकारीलाई सोधेका थिए, 'सामान्य प्रशासनमन्त्रीको अडियो आएको छ । त्यो अडियोमा केही विषयका साथ तपाईंलाई समेत संगीन आरोप लगाएका छन् । तपाईंले भनेकै जस्तो संलग्नता होइन भने आजका दिनसम्म किन खण्डन गर्नु भएन र अझै चित्त बुझ्दो जवाफ किन आएन ?
जवाफमा मन्त्री अधिकारीले कास्की जिल्ला वा अन्य जिल्लाको भूमि समस्या समाधान आयोगको अध्यक्ष चयनमा कुनै अनियमितता नभएको दाबी गरे । 'हाम्रो मन्त्रालय र मसँग जोडिएर केही कुराहरू आएको, अध्यक्ष चयन गर्ने सन्दर्भमा कतै मन्त्री पनि जोडिएका छन् कि भन्ने प्रसंगमा आयोग या आयोगका कुनै सदस्यहरू बनाउने सन्दर्भमा ममात्र होइन मेरो मन्त्रालय र मसँग सम्बन्धित कुनै पनि व्यक्तिहरूले कहीँ कतै त्यस्तो कारोबार र डिल गरेको छ भने यथार्थता ल्याइदिनुस् कानुनी बारबाही भोग्न तयार छौ,' मन्त्री अधिकारीले भने, 'अनावश्यक रूपमा हल्ला गरेर कसैको चरित्र हत्या गर्ने र कसैलाई बदनाम गराएर काममा अवरोध गर्ने यहाहरू लाई नलाग्न अनुरोध गर्न चाहन्छु ।'
कसैले गरेको कुराका आधारमा प्रश्न नगर्न पनि मन्त्री अधिकारीको भनाइ थियो । उनले कसैले गरेका कुराका आधारमा आफूलाई नमुछ्न अनुरोध गरेका थिए । उनले भने, 'जुन औँलामा विष लाग्छ त्यै औँलो झर्छ, यहाँहरूले त्यो कुरालाई बुझ्नुहुनेछ ।'
मन्त्री अधिकारीले घूस प्रकरणमा आफूले सुन्नमा आएका कुरा सार्वजनिक गर्ने पनि बताए । 'सुनेको आधारमा के गर्नुपर्छ, मैले सार्वजनिक गर्नुपर्ने मलाई महसुस भयो भने म सार्वजनिक गर्नेछु । अहिलेलाई के भन्न चाहे भने तथ्यको आधारमा अगाडि बढिदिनुस्,' उनले भने । कसैलाई नियुक्ति गर्नका लागि कसैलाई इच्छा भएको हुनसक्ने भन्दै अडियोमा आफूले भनेको मान्दैन भन्ने कुरामा पनि ध्यान दिनपर्ने अधिकारीको भनाइ थियो ।
'कसैको इच्छा होला ल न यो बनाइदे भन्यो, सम्बन्धित व्यक्तिहरूले जान्ने कुराहरू हो । त्यहाँ तपाईंहरूले यो कुरा त भन्नु भएन कि मन्त्रीले सुन्दैन, यो कुरा गर्दैन भनेको कुरा त भन्नु भएन । त्यो आएको छ भन्ने पनि सुने । त्यो कुरा त तपाईंहरूले भन्नु भएन । तथ्यको आधारमा बोलिदिनुस्,' उनले सांसदहरूलाई आग्रह गरे ।
मन्त्री गुप्ताले बिचौलियासँग गरेको कुराकानीमा कास्कीको भूमि समस्या समाधान आयोगको अध्यक्षमा खेम पुनलाई मन्त्री अधिकारीले नियुक्त नगर्ने बताएका छन् । मन्त्री अधिकारीले अर्कैबाट पैसा खाइसकेकाले आफूले भनेको नमान्ने गुप्ताले भनेका छन् ।
सांसद प्रेम सुवालले पनि उक्त प्रसंगमा मन्त्री अधिकारीसँग प्रश्न गरेका थिए । जवाफमा मन्त्री अधिकारीले यथार्थ बुझेर मात्रै प्रश्न गर्न भने । 'त्यो नियुक्ति दिने सन्दर्भमा कहीँ कतै कसैले कहीँ कुरा गर्यो फलानालाई गर्न पाए हुन्थ्यो, फलानालाई गरिदिए म यस्तो गर्छु भनेर कसैले कुरा गरेको आधारमा भूमि व्यवस्था मन्त्रालय र मन्त्रीलाई जोड्नुभएको छ भने अनुरोध गर्न चाहन्छु यथार्थता बुझेर बोल्ने गरौं,' मन्त्री अधिकारीले भने ।
भूमि व्यवस्था मन्त्री र मन्त्रालयका कुनै व्यक्तिले कुनै आयोगको अध्यक्ष वा सदस्यसँग कुनै डिलिङ गरेको, पैसा लिएको थाहा भए प्रमाणसहित आउन उनले आग्रह गरेका थिए । 'तपाईहरूले थाहा पाउनुभयो भने प्रमाणसहित ल्याउनुस् । म सम्बन्धित व्यक्ति र म आफैं भए पनि कारबाही सहन तयार छु,' उनले भने ।
