काठमाडौँ — काठमाडौं महानगरपालिकाले आगामी आर्थिक वर्ष २०८२/८३ का लागि २५ अर्ब ७६ करोड ४३ लाख रुपैयाँको बजेट ल्याएको छ । आइतबार सम्पन्न महानगरको १७ ‌औं नगरसभामा उपप्रमुख सुनिता डंगोलले आगामी आर्थिक वर्षका लागि बजेट पेस गरेकी हुन् । 

महानगरले बजेटमा २५ अर्ब ११ करोड ४३ लाख सञ्चित कोषबाट र ६५ करोड रुपैयाँ अन्य बाह्य व्ययभारबाट व्यहोर्ने अनुमान गरेको छ । सञ्चित कोषमा महानगरको आन्तरिक आय र बैंक मौज्दात गरी २० अर्ब १२ करोड ६३ लाख व्यवस्थापन हुने अनुमान छ भने संघ र प्रदेश सरकारबाट ससर्त तथा समानीकरण अनुदान र राजस्व बाँडफाँटबापत ४ अर्ब ९८ करोड ७९ लाख प्राप्त हुने अनुमान गरिएको छ । बाह्य व्ययभारअन्तर्गत महानगरभित्र सञ्चालित जग्गा एकीकरण आयोजनाबाट जग्गा बिक्री भएर आएको रकम हो । 

महानगरले पूर्वाधार विकासतर्फ कुल बजेटको ५१ प्रतिशत अर्थात् १२ अर्ब ८० करोड ८३ लाख १४ हजार रुपैयाँ प्रस्ताव गरेको छ । सामाजिक विकासमा बजेटको २० प्रतिशत अर्थात् ५ अर्ब २ करोड २८ लाख ६८ हजार, आर्थिक विकासमा ३ प्रतिशत अर्थात् ७५ करोड ३४ लाख ३० हजार प्रस्ताव गरिएको छ । सुशासन तथा अन्तरसम्बन्धित क्षेत्रतर्फ १२ प्रतिशत अर्थात् ३ अर्ब १ करोड ३७ लाख प्रस्ताव गरिएको छ । कार्यालय सञ्चालन तथा प्रशासनिक क्षेत्रतर्फ १४ प्रतिशत अर्थात् ३ अर्ब ५१ करोड ६० लाख रुपैयाँ प्रस्ताव गरिएको छ ।

आगामी आर्थिक वर्षमा महानगरले पूर्वाधार योजनाहरूलाई उच्च प्राथमिकतामा राखेको उपप्रमुख डंगोलले बताइन् । महानगरले फोहोरमैला व्यवस्थापन, विद्यालय शिक्षा प्रणालीमा सुधार, सहरी स्वास्थ्य प्रवर्द्धन केन्द्रको क्षमता वृद्धि, एक वडा एक उत्पादन कार्यक्रमलाई प्रवर्द्धन गरी रोजगारी र आय वृद्धि गर्ने योजना बनाएको छ । त्यस्तै ध्वनि प्रदूषण नियन्त्रण, सार्वजनिक यातायात व्यवस्थापन, ऐतिहासिक, धार्मिक, पुरातात्त्विक महत्त्व बोकेका सम्पदास्थल संरक्षण र प्रवर्द्धनमा समेत बजेट व्यवस्थापन गरिएको छ ।

उपप्रमुख डंगोलले बजेट प्रस्तुत गर्नुअघि महानगर प्रमुख बालेन्द्र शाहले नीति तथा कार्यक्रम प्रस्तुत गरेका थिए । उनले सहकारी सुधार, सामुदायिक विद्यालयमा ‘स्पोर्टस् एकडेमी’, उद्यमशीलता क्लबलगायत कार्यक्रम सञ्चालन गरिने जनाए ।

यस्तै, महानगरले सबैलाई करको दायरामा ल्याउन पुस मसान्तसम्म कर बुझाउने करदातालाई १० प्रतिशत छुट दिने भएको छ । उपप्रमुख डंगोलले काठमाडौंलाई सफा, हरियाली, सांस्कृतिक र जीवन्त सहरका रूपमा विकास गर्ने उद्देश्य साकार पार्न अपिल गरिन् ।

यस्तै, काठमाडौं महानगरले चालु आर्थिक वर्षको असार २५ सम्म कुल बजेटको ५२.१३ प्रतिशत मात्र खर्च गरेको छ । २४ अर्ब ९० करोड ६३ लाख बजेटमध्ये उक्त अवधिसम्म १३ अर्ब ३ करोड ७४ लाख मात्र खर्च भएको छ । पुँजीगततर्फ १५ अर्ब ६ करोड ५६ लाख विनियोजन गरिएकामा ६ अर्ब ७३ करोड ७४ लाख मात्र खर्च भएको छ । जुन ४४.७२ प्रतिशत हुन आउँछ ।