कञ्चनपुर — कञ्चनपुरको कृष्णपुर नगरपालिका १ मा छाउपडी गोठमा सुतेका बेला एक महिलाको सर्पदंशबाट मृत्यु भएपछि जिल्ला प्रशासन कार्यालयले सबै स्थानीय तहलाई छाउपडी गोठ भत्काउने अभियान सुरु गर्न निर्देशन दिएको छ । सोमबार प्रमुख जिल्ला अधिकारी लक्ष्मण ढकालले जिल्लाका नौ वटै स्थानीय तहलाई निर्देशन दिएको हो ।
शुक्रबार छाउपडी गोठमा सुतेकी २८ वर्षीया कमला आउजी दमाईको सर्पले डसेपछि धनगढीको सेती प्रादेशिक अस्पतालमा उपचारका क्रममा शनिबार मृत्यु भएको थियो ।
छाउपडी गोठ भत्काएर परम्पारगत कुप्रथा अन्त्य गर्न विशेष अभियान सञ्चालन गर्नुपर्ने भएकाले आवश्यक निर्णय गरी अभियान सञ्चान गर्न प्रमुख जिल्ला अधिकारी ढकालले सबै स्थानीय तहलाई निर्देशन दिएका हुन् ।
आइतबार कृष्णपुर नगरपालिकाले पनि सबै वडा कार्यालयलाई छाउपडी गोठ भत्काउन निर्देशन दिएको थियो । १५ दिनभित्र छाउपडी गोठ नभत्काए कानुनी कारबाहीसँगै १० हजार जरिवानासमेत गरिने चेतावनी दिएको थियो ।
