कारागारको बन्दीगृहभित्र महिलाका लागि २ वटा बेग्लै कोठा छन् । पुरुष कैदीबन्दीका लागि बेग्लै कोठा र हल छ । प्रायः सबै भुइँमै सुत्ने गरेका छन् । ४ बिघा क्षेत्रफलमा फैलिएको कारागार परिसर धनगढी बजार क्षेत्रको होचो स्थानमा छ । 

जसका कारण वर्षायाममा कारागार आसपासको क्षेत्र जलमग्न हुने गरेको छ । सोमबार कारागारको भित्रसम्म पानी पसेको थियो । ‘तर पूरै डुबानमा परेर बस्नै नसक्ने अवस्था भने छैन, कारागार जीर्ण अवस्थामा पुरानो भए पनि नियमित मर्मत सम्भार हुँदै आएको छ,’ जेलर खत्रीले बताए ।

जेलर खत्रीका अनुसार कैलाली कारागारको हालको पुरानो संरचनाको ठाउँमा नयाँ आधुनिक भौतिक पूर्वाधार निर्माण गर्ने तयारी भइरहेको छ । ‘नयाँ भौतिक पूर्वाधारका लागि ५४ करोड लागतको विस्तृत परियोजना प्रतिवेदन डीपीआर तयार गरी कारागार विभागमा पठाइएको छ,’ जेलर खत्रीले भने, ‘नयाँ कारागार कहिले बन्छ, त्यो त थाहा भएन तर प्रक्रिया भने सुरु भएको छ ।’