काठमाडौँ — छाउगोठमा सुतेकी महिलालाई सर्पले डस्दा मृत्यु,  सरुवा र नियुक्तिका विषयमा मन्त्रीको अडियो काण्डबारे छानबिन गर्न विपक्षी दलको माग, पुरानाले देश बिगारे भन्दै घण्टी बजाउँदै आएकाहरूको हालत पनि उस्तै रहेको सांसद केसीको भनाइ, पर्खाल नै नलगाएको अलपत्र भवनमा प्लाईउडले बारेर पठनपाठनदेखि स्पेसएक्सले एक्सएआईमा दुई अर्ब अमेरिकी डलर लगानी गर्नेसम्मका खबर आज चर्चामा रहे । 

०००००

महिनावारी भएका बेला छाउगोठमा रहेकी एक महिलाको सर्पको डसाइबाट मृत्यु भएको छ । कञ्चनपुरको कृष्णपुर नगरपालिका(१ निगालीकी २८ वर्षीया कमला आउजी दमाईको ज्यान गएको हो । जिल्ला प्रहरी कार्यालय कञ्चनपुरका अनुसार धनगढीस्थित सेती प्रदेशिक अस्पतालमा शनिबार साँझ उपचारका क्रममा उनको मृत्यु भएको हो ।  

०००००

रास्वपा सांसद सुमना श्रेष्ठले आफूहरुले उठाउँदै आएको विषय स्पेनको सेभिल घटनाले पुष्टि गरेको बताएकी छन् । ‘सबैभन्दा दुस्खको कुरा सदनमा आन्दोलन हुँदै गरेका बेला पनि बिचौलियालाई डर न संकोच । कसको अकर्मण्यताले मानव तस्करहरुमा यस्तो आँट पलाएको हो ?’ आजको प्रतिनिधिसभा बैठकमा उनले भनिन् । कोभिडपछि दुबई गएका नेपाली भिजिट भिसामा बिचल्ली परेपछि गठित कार्यदल र अहिलेको कार्यदलमा केही फरक नरहेको उनको भनाइ थियो ।