काठमाडौँ — भोटेकोशी बाढी : ५७ जनाको उद्धार, २० अझै बेपत्ता, २ सय मेगावाट विद्युत् उत्पादन बन्द, एक महिनामै भित्रियो १ खर्ब ७६ अर्ब रेमिट्यान्स, ‘कुलिङ अफ पिरियड’मा छलछामको संसदीय समितिले थाल्यो छानबिन, अमेरिकाको टेक्सासमा बाढी : मृतकको संख्या एक सय नाघ्योदेखि प्रतिकूल मौसम र कमजोर पूर्वाधारका कारण १०औँ राष्ट्रिय खेलकुद स्थगितसम्मका खबर आज चर्चामा रहे । 

००००

रसुवाको भोटेकोशी नदीमा सोमबार राति आएको बाढी पहिरोमा फसेका ५७ जनाको उद्धार गरिएको छ । ति मध्ये हेलिकोप्टरबाट ३० जना र टिमुरे इलाकासहितबाट २७ जनाको उद्धार गरिएको नेपाली सेनाले जनाएको छ । बाढी पहिरोमा परी २० जना बेपत्ता भएका छन् । बाढीले झन्डै २ सय मेगावाट विद्युत् उत्पादन पनि बन्द भएको छ ।

००००

मुलुकमा एक महिनामै रेमिट्यान्स डेढ खर्बभन्दा बढी भित्रिएको छ। २०८२ जेठ महिनाको रेमिट्यान्स आप्रवाह १ खर्ब ७६ अर्ब ३२ करोड रुपैयाँ रहेको छ । अघिल्लो वर्षको सोही महिनामा यस्तो आप्रवाह १ खर्ब २८ अर्ब ९१ करोड रुपैयाँ रहेको थियो।

००००

संघीय निजामती सेवा विधेयकमा ‘कुलिङ अफ पिरियड’को व्यवस्था हेरफेर गरिएको विषयमा गठित संसदीय छानबिन समितिको बैठक सुरु भएको छ । सभामुख देवराज घिमिरेको उपस्थितिमा संसद् भवन नयाँ बानेश्वरमा समितिको बैठक सुरु भएको हो । संघीय निजामती सेवा विधेयकमा ‘कुलिङ अफ पिरियड’को व्यवस्था हेरफेर गरिएको विषयमा छानबिन गर्न सोमबार ७ सदस्यीय विशेष समिति गठन भएको थियो ।