शिवाकोटीले सभापति शेरबहादुर देउवालाई समेत प्रश्न सोधेका छन्, ‘सभापतिज्यू, यस्तो अराजकता कहिलेसम्म? मर्यादाहीन विषयलाई पार्टी रेकर्डमा राखेर हामी नयाँ पुस्तालाई के सन्देश दिन खोजिरहेका छौं ? यस्तो गैरजिम्मेवार र अराजक भनाइ पार्टीको रेकर्डबाट हटाइनुपर्छ ।’

उनले सहकारी ठगी प्रकरणमा पुर्पक्षका लागि थुनामा रहेका रवि लामिछानेको अभिव्यक्तिको उल्लेख गर्दै भने, ‘लामिछानेले 'गगन थापाको पनि फाइल आफूसँग छ' भनेजस्तै बस्नेतज्यूले बुधबारको बैठकमा उही शैलीमा प्रस्तुत हुनुभयो । यदि फाइल छ भने कानुनी निकायमा बुझाउनुस्, थर्काउने होइन । भ्रष्टाचारमा फसेको फाइल भएको दाबी गरेर थापाविरुद्ध अतिरिक्त माया देखाउने किन ?’

शिवाकोटीले सुशासनका लागि मुद्दा नटुंगिन्जेल पार्टीको पदबाट अलग हुनु नै हितकर हुने बताए । उनले थपे, ‘अहिले जे भइरहेको छ, त्यो तपाईंको कर्मले हो । अरूलाई दोष नदिई आत्मसमीक्षा गर्नुस् । पार्टीलाई बदनाम बनाउने छुट तपाईंलाई छैन ।’