काठमाडौँ — माओवादी केन्द्रका उपमहासचिव जनार्दन शर्माले निजमती कर्मचारीको संख्या आधा कटौती गर्नुपर्ने बताएका छन् । प्रतिनिधिसभामा संघीय निजामती सेवा विधेयकमाथिको छलफलका क्रममा सांसद शर्माले परिणाम नदिने निजामती सेवामा रहेका कर्मचारीको संख्या कटौती गर्नुपर्ने बताएका हुन् । 

प्रतिनिधिसभाको आइतबारको बैठकमा सांसद शर्माले स्थायी कर्मचारी संयन्त्रले शासन मात्रै गरिरहेको तर परिणाम नदेखिएको बताएका हुन् । कर्मचारीको संख्या कटौती गरेर करारमा कर्मचारी लिएर सेवा लिनुपर्ने उनको प्रस्ताव थियो । 

मुलुकले साधारण खर्च पनि धान्न नसक्ने तर कर्मचारीको तलब र सेवासुविधामा ठूलो रकम खर्च गर्नुपर्ने अवस्थाको अन्त्य गर्न पनि संख्यामा कटौती गर्नुपर्ने शर्माको भनाइ थियो । 'साधारण खर्च नधान्ने अवस्थामा भारीभरकम कर्मचारीलाई आधा कटौती गर्नुपर्छ भन्ने मान्यता राख्दै आएको छु । त्यसलाई पनि यो विधेयकले सम्बोधन गर्नुपर्छ । सेवा करारमा राखेर परिणाममुखी काम गर्नुपर्छ, भद्दा परिणामविहीन संरचनाको आश्यकता छैन,' उनले भने ।