कास्की — एमाले महासचिव शंकर पोखरेलले रास्वपा सभापति रवि लामिछानेले आफ्नै कारणले दुःख पाएको जिकिर गरेका छन् । पार्टी पोखरा महानगर कमिटीले ७४ औं मदन जयन्तीको अवसरमा शनिबार आयोजना गरेको कार्यक्रममा बोल्दै उनले तल्लो अदालतले धरौटीमा छोड्दा माथिल्लो अदालत गएर दुःख पाएकाले कसैलाई दोष दिनु जायज नभएको बताए ।

‘खुरुखुर तल्लो अदालतको आदेश मानेर बसेको भए धरौटीमा छोडेकै थियो । जान्नेलाई छान्ने भन्ने, माथिल्लो अदालत गएपछि दुःख पाएको त हो नि । यही होइन र ?’ उनले भने । 

सहकारीको पैसा दुरुपयोग गरेर कारागार पुग्दा षड्यन्त्र भयो भन्नु ठीक नभएको उनको भनाइ थियो । ‘पैसा लैजाने, दुरुपयोग गर्ने र भन्ने ममाथि षड्यन्त्र भयो । कानुनले नदिने काम गर्नु भनेर कसैले हात डोहोर्‍याएर लग्या थियो र ?’ उनले भने, ‘रामकुमारी झाँक्रीले माधव नेपाललाई निर्वाचन आयोग लैजान हात तान्नेजस्तो थियो र रवि लामिछानेको हकमा ? त्यस्तो दृश्य त हामीले कहीँ देखेनौं ।’