काठमाडौँ — शिक्षा, विज्ञान तथा प्रविधिमन्त्री रघुजी पन्तले शिक्षामा निजी क्षेत्रलाई पनि ठाउँ दिनुपर्ने बताएका छन् । उनले हुनेखानेहरूका सन्तानलाई पढाउनका लागि निजी क्षेत्रलाई विद्यालय खोल्न दिनुपर्ने बताएका हुन् । 

विद्यालय शिक्षा विधेयकमाथि प्रतिनिधिसभाको शिक्षा, स्वास्थ्य तथा सूचना प्रविधि समितिको शुक्रबारको बैठकमा मन्त्री पन्तले महँगो पैसा तिरेर पढ्छु भन्ने हुने खानेहरूका लागि विद्यालय खोल्न दिनुपर्ने बताएका हुन् ।

विगतमा नेपालमा राम्रा निजी विद्यालय नहुँदा भारतका विभिन्न ठाउँमा जाने गरेको उल्लेख गर्दै पन्तले निजी क्षेत्रलाई शिक्षामा प्रवेश गराउनुपर्ने बताए । राज्यले अनिवार्य र निःशुल्क शिक्षाबाट पछि हट्न नमिल्ने तर निजी क्षेत्रलाई महंगा शिक्षालय खोल्न दिनुपर्ने पन्तको भनाइ छ ।

'हुनेखानेले पैसा खर्च गरेर पढ्छु भन्नेलाई विकल्प उपलब्ध गराउन सकिएन भने पुँजी पनि बाहिर जान्छ, मानव पनि बाहिर जान्छ । योभन्दा राज्य के अनिवार्य र निःशुल्क शिक्षाबाट हट्यो त ? होइन, हटेको छैन । राज्यको अनिवार्य र निःशुल्क शिक्षा ती मानिसहरूलाई हो, जसलाई जरुरत छ । जसको लागि आवश्यकता छ त्यसको लागि राज्य उपलब्ध हुनुपर्दछ,' पन्तले भने, 'जो सरकारी स्कुलमा पढ्न आउँछन्, अर्बपतिको छोरा पनि सार्वजनिक विद्यालयमा पढ्न आउँछु भन्दा त तपाईँले रोक्न सक्नुहुन्न, रोक्नुहुन्न । उनीहरूलाई पनि खुल्ला छ ।'