काठमाडौँ — प्रधानमन्त्री केपी शर्मा ओलीले शुक्रबार बिहान ललितपुरको ग्वार्को चोकमा बनेको 'ओभरपास' लाई 'नेपालकै पहिलो फ्लाइओभर' भनेर सामाजिक सञ्जालमा पोस्ट गरेका थिए । शुक्रबार दिउँसो ओभरपास उद्घाटन कार्यक्रम तय गरिएको थियो ।
प्रधानमन्त्री ओलीबाटै रिबन काटेर ओभरपासको उद्घाटन गर्ने पूर्वनिर्धारित कार्यक्रम थियो । तर प्रधानमन्त्री ओलीले ट्राफिक प्रहरी महाशाखा प्रमुख एसएसपी नवराज अधिकारीलाई रिबन काट्न लगाए ।
उनले फेसबुकमा लेखेका छन्, 'सडकको जाम व्यवस्थापन गर्न ट्राफिक प्रहरी सडकमा अहोरात्र खट्छन् । ट्राफिक व्यवस्थापन गर्न उनीहरूले धेरै दुःख र मेहनत गर्नु परेको हुन्छ। ट्राफिक प्रहरीका वरिष्ठ उपरीक्षक नवराज अधिकारीले ग्वार्को ओभरपासको उद्घाटन गर्दा आज साक्षी बन्ने अवसर मिल्यो ।'
ओलीले आफू उद्घाटनको साक्षी मात्रै बनेको भने पनि शिलालेखमा भने उनकै नाम पहिले नै राखिइसकेको थियो । 'सम्माननीय प्रधानमन्त्री श्री केपी शर्मा ओलीज्यूबाट काठमाडौं चक्रपथ कलंकी-कोटेश्वर खण्डमा नवनिर्मित ग्वार्को फ्लाईओभरको समुद्घाटन सु-सम्पन्न भयो,' शिलालेखमा लेखिएको छ ।
