दाउन्ने, नवलपरासी — मंगलबार रातिको वर्षापछि दाउन्नेको हिलोमा गाडी फस्दा र दुम्कीवासमा विनयी खोलाले डाइभर्सन बगाउँदा करिब ५० किलोमिटर लामो जाम भएको छ । पूर्व पश्चिम राजमार्गअन्तर्गत पश्चिम नवलपरासीको भुताहादेखि पूर्वी नवलपरासीको डन्डासम्म जाम भएको हो ।
दुम्कीवासबाट ३ किलोमिटर पश्चिममा रहेको विश्वकर्मा मन्दिरनजिक निर्माणाधीन पुलमा फसेको मालबाहक गाडी बुधबार साँझसम्म पनि निकाल्न सकिएको छैन । यता दुम्कीवासस्थित विनयी खोलाले मंगलबार राति बगाएको डाइभर्सन मर्मत हुन नसक्दा चोरमारासम्म लामो जाम छ । यो सडकखण्डमा दैनिक साना ठूला गरी करिब १५ देखि १८ हजार गाडी सञ्चालन हुने गरेका छन् ।
काठमाडौंबाट धनगढी हिँडेका मोहनदेव नाथले बच्चासहित दुम्कीवासमा गए राति २ बजेदेखि फसेको बताए । ‘राजमार्गमा हेर्नुस् त यात्रुको बिजोग । दाउन्ने सडक खण्डको यस्तो दुर्दशा भएको वर्षौं भयो, खै सरकार ? यात्रुहरुले राजमार्गमा प्रदर्शन नै गर्नुपर्ने हो ?’ उनको प्रश्न थियो । पोखराबाट बुटवल हिँडेका रमाकान्त पराजुली बालबच्चासहित १७ घण्टादेखि जाममा परेको सुनाए । ‘गाडी हिँड्दै हिँड्दैन, बिरामी भैइएलाझैं भइसक्यो,’ उनले भने, ‘बालबच्चाको बिजोग भयो, यस्तो चर्को घाम छ । यहाँ त यात्रुले जुलुस निकाल्ने बेला भइसक्यो ।’
जिल्ला प्रहरी प्रमुख यादव ढकालले दाउन्नेमा जाम नहोस् भनेर ठाउँठाउँमा प्रहरी राखेर पूर्वी र पश्चिम नवलपरासीका विभिन्न स्थानमा गाडी रोकिएको बताए । ‘दाउन्नेमा बाटो खुल्नासाथ साना गाडी र यात्रुबाहक बसलाई प्राथमिकतामा राखेर यातायात सञ्चालन गर्ने तयारी छ,’ उनले भने ।
विनयी खोलाले बगाएको डाइभर्सन पुनर्निर्माण गरिरहेको सडक विभागले जानकारी दिएको छ । सामान्य पानी पर्दा विनयी खोलामा आउने भेलले ग्राभेल हालेर बनाइएको डाइभर्सन बगाउने गरेको छ । विनयी खोलामा रहेको फलामे पुल ६ महिनाअघि भाँच्चिएपछि डाइभर्सन बनाएर यातायात सञ्चालन भइरहेको छ । असार २२ देखि नयाँ पुलबाट यातायात चलाउन सकिने डिभिजन सडक कार्यालय चितवनले जनाएको छ ।
बुटवल–नारायणगढ सडक विस्तार सुरु भएदेखि नै दाउन्ने खण्डमा आवागमनमा समस्या छ । घुमाउरो र पहाडी भागमा पर्ने दाउन्नेका पुरानो पक्की सडक भत्काएर छोडिएको छ । राजमार्ग खनिएका कारण धुलाम्मे छ । त्यो धूलोमा सामान्य वर्षा हुनासाथ २–३ फिटसम्मको हिलो जम्ने गरेको छ । गाडी हिलोमा फस्ने गरेका कारण त्यहाँ दिनहुँजसो घण्टौं जाम हुने गरेको छ ।
गैंडाकोटदेखि दाउन्ने पहिलो खण्ड ६५ किमि र दाउन्ने–बुटवल दोस्रो खण्ड ४९ किमि विस्तारका लागि चिनियाँ कम्पनी चाइना स्टेट कन्स्ट्रक्सनले चैत २०७५ मा १६ अर्ब ९९ करोडमा रुपैयाँमा ठेक्का लिएको थियो । सम्झौताअनुसार साउन ०७९ भित्र काम सकिनुपर्थ्यो । तर कोभिड–१९ र निर्माण सामग्री अभावको कारण देखाएर पहिलो पटक ११ साउन ०८० सम्म म्याद थपिएको थियो । त्यसपछि पनि दुई पटक म्याद थपेर ८ साउन ०८२ सम्म पुर्याइएको छ । तर म्याद सकिन करिब एक महिना बाँकी हुँदा पनि काम सकिने छाँटकाँट छैन । निर्माण सकिएपछि पनि ५ वर्षसम्म ठेक्का लिने व्यवसायीले नै सडकको मर्मत सम्भार गर्नुपर्ने सम्झौता छ ।
