रास्वपा सांसदले भने, 'हामीलाई कुर्सी तोड्न आउँदैन', माइक भाँच्न आउँदैन'
काठमाडौँ — कांग्रेसले रास्वपा सांसदहरू संसदीय मर्यादाविपरीत संसद्मा उपस्थित भएको भन्दै निष्कासन गर्न सभामुखसमक्ष माग गरेको छ । भिजिट भिसा प्रकरणको विरोधमा उभिएको रास्वपाका सांसदहरू मंगलबार निलो रिबन भिरेर संसद् बैठकमा उपस्थित भएका थिए ।
निलो रिबन भिरेरै नाराबाजी गरेपछि कांग्रेसले नियमापत्ति जनाउँदै रास्वपा सांसदहरूलाई निष्कासन गर्न सभामुखसमक्ष माग गरेको हो ।
कांग्रेसका प्रमुख सचेतक श्यामकुमार घिमिरेले संसद्मा मर्यादित पोसाकमा आउने व्यवस्था गरिएको स्मरण गराउँदै रास्वपाका सांसदहरूले भिरेको रिबन मर्यादित पोसाकभित्र पर्छ कि पर्दैन भन्ने प्रश्न गरेका थिए ।
'भोलि कोही हाफ पाइन्ट मात्र लगाएर आउने, जथाभाबी ड्रेसमा आउने, जे पनि लगाएर आउन थाल्यो भने त्यसलाई संसद्को मर्यादाभित्र राख्ने कि नराख्ने ? यस्तो किसिमको व्यवहार गर्ने माननीय सदस्यहरूलाई सभामुखले चेतावनी दिने र संसद्बाट निष्कासन गर्न आवश्यक छ भन्ने कुरामा ध्यानाकर्षण गराउँछु,' कांग्रेस सचेतक घिमिरेको भनाइ थियो । घिमिरेको नियमापत्तिपछि प्रतिउत्तरस्वरूप रास्वपा सांसदहरूले 'हामीलाई कुर्सी तोड्न आउँदैन', माइक भाँच्न आउँदैन' भन्दै नाराबाजी गरेका थिए ।
भिजिट भिसा प्रकरणमा गृहमन्त्री रमेश लेखक मुछिएको आरोप लगाउँदै राजीनामा र उच्चस्तरीय छानबिन समितिको माग गर्दै रास्वपाका सांसदहरूले लगातार संसद् अवरोध गर्दै आएका छन् । उनीहरूले गत जेठ १३ देखि संसद् विरोध गर्दै आएका छन् । मंगलबारको प्रतिनिधिसभा बैठकमा पनि रास्वपाका सांसदहरूले निलो रिबन लगाएर नाराबाजी गरेपछि सभामुख देवराज घिमिरेले आधा घण्टाका लागि बैठक स्थगित गरेका छन् ।
घिमिरेको भनाइ
यो संसद्मा मर्यादित पोशाकमा आउनुपर्छ भन्ने व्यवस्था गरिएको छ । यो नियमावलीमै गरिएको व्यवस्था हो । यो संसद्मा अहिले केही मान्य सदस्यहरूले जुन स्कार्फ लगाएर आउनुभएको छ, यो मर्यादित पोसाकभित्र पर्छ कि पर्दैन ? यसरी भोलि कोही हाफ पाइन्ट मात्र लगाएर आउने, जथाभाबी ड्रेसमा आउने, जे पनि लगाएर आउन थाल्यो भने त्यसलाई संसद्को मर्यादाभित्र राख्ने कि नराख्ने ? यस्तो किसिमको व्यवहार गर्ने माननीय सदस्यहरूलाई सभामुखले चेतावनी दिने र संसद्बाट निष्कासन गर्न आवश्यक छ भन्ने कुरामा ध्यानाकर्षण गराउँछु ।
