काठमाडौँ — भिजिट भिसा प्रकरणको न्यायिक वा संसदीय छानबिनको लिखित रुपमा सुनिश्चितता गरेर संसद्को अवरोध हटाउन विपक्षी दलहरूले सत्तापक्षलाई भनेका छन् । विपक्षीको प्रस्तावपछि सत्तारूढ कांग्रेस र एमालेका नेताहरू छलफलमा छन् । 

बिहीबार ३ बजेका लागि बोलाइएको प्रतिनिधिसभा बैठकमा दलहरूबीच सहमति नजुटेपछि विपक्षी दलहरू माओवादी, रास्वपा, एकीकृत समाजवादी लगायतका नेताहरू बसेर सत्तापक्षसँग छानबिनको लिखित सुनिश्चितता माग गरेमा हुन् । 'आजको विपक्षी दलहरूको बैठकपछि लिखित रुपमा छानबिन तथा अध्ययनको सुनिश्चितता माग गरेका छौं । प्रमुख प्रतिपक्षी दलका नेताले विपक्षी दलहरूको तर्फबाट छानबिनको लिखित सुनिश्चितता माग गरेका हौं । सत्तारूढ दलको प्रतिक्रिया पर्खिइरहेका छौं,' माओवादी प्रमुख सचेतक हितराज पाण्डेले बताए ।

छानबिन वा अध्ययनका लागि सरकारले लिखित रुपमा सुनिश्चितता गर्नुपर्ने माग सत्तारुढ दलहरूसमक्ष विपक्षीले राखेका हुन् । अख्तियारले गरिरहेको अनुसन्धानबाहेक न्यायिक वा संसदीय छानबिन हुने लिखित रुपमा सुनिश्चितता गर्नुपर्ने विपक्षीहरूको माग छ ।

विपक्षीको प्रस्तावपछि सत्तारूढ दलहरू एमाले र कांग्रेसका नेताहरू संसद् भवनमै बैठक बसेका थिए । उक्त बैठकपछि फेरि सत्तारूढ र विपक्षी दलहरूको बैठक बस्ने छ ।