धरान — कांग्रेस महामन्त्री गगन थापाले गणतन्त्र व्यवस्था मात्र नभएर यो संस्कार भएको बताएका छन् । नेपाल लोकतन्त्रवादी आदिवासी याक्थुङ संघको प्रथम महाधिवेशनमा सम्बोधनका क्रममा उनले पछिल्लो समय गणतन्त्रविरोधी भाष्य निर्माण भएको भन्दै राजतन्त्र फर्किने कल्पनासमेत गर्न नसकिने बताए ।
संघीयताको विकल्पबारे पनि नसोच्न उनले आग्रह गरेका छन् ।
कांग्रेसका नेताहरू नै विचलित भएर संघीयताको विरोध गरेको भन्दै उनले त्यसमा स्पष्ट हुनुपर्ने बताए ।
अन्य पार्टीभन्दा अगाडि कांग्रेस संघीयता र विकेन्द्रीकरणको पक्षमा उभिएको दाबी गर्नै उनले भने, 'गणतन्त्र आफ्नो धर्म र जातमा विश्वास गर्दैगर्दा अर्को जात र धर्मको सम्मानभाव आउने व्यवस्था हो ।'
'नेपाली राज्यको धर्म न्याय गर्नु, विभेद नगर्नु, सम्मान गर्नु हो । मञ्चमा र मनमा एउटै कुरा स्पष्टताका साथ राख्नसक्नु गणतन्त्र हो,' उनले भने, 'महिला, दलित, जनजाति वा अन्य समुदायप्रति मन्चमा जे बोकिन्छ, गोप्य कोठामा पनि त्यही भाव विकास हुनु गणतन्त्र हो ।'
