अध्यक्ष दाहालले यस विषयमा देउवालाई पनि थाहा नभएको बुझिएको बताए । उनले अगाडि भने, 'यो मुद्दा दर्ता गर्ने बेलामा कांग्रेस सभापति शेरबहादुर देउवाजीसँग सल्लाह गरेर भएको रहेनछ भन्ने मलाई लाग्यो । देउवाजी झुटचाहिँ बोल्नुहुन्न । योचाहिँ प्रतिशोध साध्ने ढंगले नै सरकार गएको देखिन्छ ।'  नेपालमाथि अख्तियारले मुद्दा चलाएको विषयमा प्रधानमन्त्री केपी शर्मा ओलीको राजनीतिक प्रतिशोधको गन्ध आएको बताएका छन् । शुक्रबार संसद्‍ भवनबाहिर सञ्चारकर्मीहरूसँगको कुराकानीमा अध्यक्ष दाहालले मुद्दा दर्ता भए पनि अदालतले सफाइ दिनेमा स्वयं नेपाल र आफू पनि विश्वस्त रहेको बताएका हुन् ।

पहिले मन्त्रिपरिषद्का निर्णय आफ्नो क्षेत्राधिकारभित्र पर्दैन भनेर पन्छिएको अख्तियारको पछिल्लो कदमले प्रश्न पनि उब्जिएको दाहालले बताएका छन् । 'स्वयं माधवजी नै आश्चर्यमा परेको कुरा गर्नु भएको छ, उहाँले अदालतप्रति पनि भरोसा देखाउनु भएको छ । अदालतले न्याय गर्छ भन्ने उहाँले विश्वास व्यक्त गर्नु भएको छ । छिट्टै सफाइ पाएर फर्किन्छु भन्ने उहाँले विश्वास व्यक्त गर्नु भएको छ । मैले पनि उहाँले सफाइ पाउनुहुन्छ होला भन्ने विश्वास गरेको छु,' अध्यक्ष दाहालले भने ।