काठमाडौँ — सार्वजनिक ओहदाको परिचय लुकाएर आर्थिक अनियमितता गरेको अभियोगमा अख्तियार दुरुपयोग अनुसन्धान आयोगले रामेछापको मन्थली नगर विकास समितिका अस्थायी नायब सुब्बा टिकाप्रसाद भट्टसहित ६ जनाविरुद्ध भ्रष्टाचार मुद्दा दायर गरेको छ । 

नासु भट्टसहित सघन सहरी तथा भवन निर्माण आयोजनाका तत्कालीन कार्यालय प्रमुखहरु अमरबहादुर थापा, नारायणप्रसाद भण्डारी, सुरेशकुमार वाग्ले, लेखा प्रमुखहरु यमलाल बेल्वासे र सुरेशप्रसाद दाहालविरुद्ध शुक्रबार विशेष अदालतमा भ्रष्टाचार मुद्दा दायर भएको हो । प्रतिवादीहरुविरुद्ध अख्तियारले १ करोड १५ लाख ४ हजार १११ रुपैया बिगो कायम गरी कैद र जरिवाना मागदाबीसहित मुद्दा दायर गरेको हो । 

सार्वजनिक पदमा रहेकै बेला भट्टले आफ्नो परिचय लुकाएर कान्तिपुर दैनिकको रामेछाप संवाददाता भएर समेत काम गरेका थिए । उनी विरुद्ध गुनासो आएपछि कान्तिपुर पब्लिकेसन्सले डेढ वर्षअघि नै उनलाई हटाइसकेको छ । भट्ट २०४९ साउन १ देखि अस्थायी खरिदार पदमा सेवा प्रवेश गरेका थिए । त्यसपछि कर्मचारीहरुकै मिलेमतोमा उनको अनिश्चितकालीन म्याद थप गराएर जागिर लम्ब्याएको समेत अख्तियारको अनुसन्धानबाट खुलेको छ । 

२०७० माघ १ मा अस्थायी खरिदार पदबाट नायब सुब्बामा उनको बढुवा भएको थियो । 'अस्थायी कर्मचारीले स्थायी कर्मचारीसरह गैरकानुनी तवरबाट ग्रेड सुविधा लिएको, अनिश्चितकालीन म्याद थप साथै बढुवासमेत भएको देखिन्छ । निज प्रतिवादी भट्टले बढुवा प्राप्त गर्न दिएको निवेदन, निजको शैक्षिक योग्यता र कार्य सम्पादनको स्तरलाई हेरि बढुवा गर्ने राय पेस गरेकोमा बढुवाको निम्ति खटिएको कार्यदलले सोको कुनै प्रक्रिया पूरा गरेको देखिँदैन,' अख्तियारले विशेष अदालतमा दायर गरेको अभियोग पत्रमा भनिएको छ ।