काठमाडौँ — माओवादी उपाध्यक्ष सापकोटाविरुद्ध ज्यान मुद्दामा अनुसन्धान हुने, ‘राइड सेयरिङ’ नियमन समेटेर गण्डकीको नीति तथा कार्यक्रम सार्वजनिक, भिजिट भिसा प्रकरणमा विपक्षी दलको अडान कायमै, बिहीबारसम्मका लागि बैठक स्थगितदेखि दक्षिण कोरियाको राष्ट्रपतिमा जे–म्यूङ निर्वाचितसम्मका खबर आज चर्चामा रहे । 

०००

माओवादी केन्द्र उपाध्यक्ष तथा पूर्वसभामुख अग्निप्रसाद सापकोटाविरुद्ध ज्यान मुद्दामा अनुसन्धान हुने भएको छ । सर्वोच्च अदालतको संवैधानिक इजलासले सापकोटाविरुद्ध १४ वर्ष पुरानो रिटमा सुनुवाइ गर्दै ज्यान मुद्दामा अनुसन्धान गर्न सरकारलाई परमादेश दिएको हो । सापकोटा सूचना तथा सञ्चारमन्त्री भएका बेला कनकमणि दीक्षितलगायत मानवअधिकारवादीले रिट दायर गर्दै ज्यान मुद्दाका दोषीलाई मन्त्री बनाएको भन्दै उनलाई बर्खास्त गरी जिल्ला अदालत काभ्रेमा मुद्दा चलाउनुपर्ने माग गरेका थिए । 

०००

संघ सरकारको हस्तक्षेपपछि राइड सेयरिङ नियमावली कार्यान्वयनबाट तत्काललाई पछि हटेको गण्डकी प्रदेश सरकारले त्यसको नियमन गर्ने विषय समेटेर आगामी आर्थिक वर्षको वार्षिक नीति तथा कार्यक्रम सार्वजनिक गरेको छ । प्रदेश प्रमुख डिल्लीराज भट्टले प्रदेशसभाको बुधबारको बैठकमा प्रस्तुत गरेको आगामी आव २०८२र८३ को वार्षिक नीति तथा कार्यक्रममा राइड सेयरिङलाई प्रभावकारी नियमन र व्यवस्थापन गरिने उल्लेख छ । 

०००

भिजिट भिसा प्रकरणले प्रतिनिधिसभा बैठक निरन्तर अवरुद्ध भइरहेको छ । बुधबार पनि बैठक नै नबसी बिहीबारसम्मका लागि स्थगित गरिएको छ । १ बजेका लागि बोलाइएको बैठक केही बेरअघि संघीय संसद् सचिवालयले सूचना टाँस गरेर ३स्१५ बजेका लागि सारिएको बताएको थियो । तर उक्त समयमा पनि बैठक नबसेपछि संसद् सचिवालयले बिहीबार दिउँसो १ बजेसम्मका लागि प्रतिनिधिसभा बैठक स्थगित भएको जनाएको छ ।