काठमाडौँ — नेपालमा पहिलोपटक ‘मलबर विस्लिङ’ प्रजातिको चरा अभिलेख गरिएको छ । लुम्बिनी प्रदेशको रुपन्देहीस्थित गोलपार्क नजिक लुम्बिनी केबलकार स्टेसन क्षेत्रमा शुक्रबार उक्त चरा देखिएको हो ।
नेपाल पंक्षी संरक्षण संघका परियोजना अधिकृत देउबहादुर राना र अमृत नेपालीले चरा अवलोकन क्रममा अनौठो निलो रङको यो चरा देखेका हुन् । यसको निधारमा स्पष्ट 'भी' आकारको चम्किलो निलो थोप्लो, काँधमा उज्यालो निलो भाग र कालो चुच्चो छ ।
अवलोकनपछि उनीहरूले लिएको तस्बिर र भिडियो बर्डलाइफ इन्टरनेसनल र बम्बई नेचुरल हिस्ट्री सोसाइटी भारतका चराविज्ञलाई पठाइएको थियो । विस्तृत अध्ययन र तुलनापछि चरा मलबर विस्लिङ नै पुष्टि भएको अधिकृत रानाले बताए ।
'नेपालमा यस प्रजातिको चराको पहिलो आधिकारिक अभिलेख भएको छ,' उनले भने, 'यो फिरन्ते हो वा यस क्षेत्रमा पहिले पत्ता नलागेको भन्ने विषयमा थप अनुसन्धान जरुरी छ ।' यो चरा भारतको पश्चिमी घाट र मध्य भारतमा मात्र पाइन्छ ।
