नवलपरासी — बिहीबार रातिको बाढिले बगाएको पूर्व–पश्चिम महेन्द्र राजमार्ग अन्तर्गत चोरमारा र दाउन्नेमा वैकल्पिक सडक निर्माण गरेर केहीबेर अघिदेखि यातायात सञ्चालन भएको छ ।
दुम्किबासको विनयी खोलामा बगाएको डाइभर्सन निर्माण गर्न अझै एक घण्टाभन्दा बढी समय लाग्ने प्रहरीले जनाएको छ ।
जिल्ला प्रहरी प्रमुख यादव ढकालका अनुसार बिहीबार रातिको वर्षातले महेन्द्र राजमार्ग अन्तर्गत पर्ने चोरमारा, दुम्किबास र दाउन्ने सडकको डाइभर्सन बगाएका कारण यातायात ठप्प भएको र शुक्रबार बिहान पौने ८ बजेबाट चोरमारा र दाउन्नेमा सुरु भएको जानकारी दिए ।
चोरमारामा पुल नजिकैबाट डाइभर्सन निर्माण गरेर यातायात सुरु गरिएको छ । 'दाउन्नेमा एकतर्फी यातायात सुरु भएको छ,' ढकालले भने, 'दुम्किबासको विनयी खोलामा डाइभर्सन बनाउने काम भइरहेको छ ।'
राजमार्ग बगाएका स्थानमा वैकल्पिक कच्ची सडक निर्माणको काम शुक्रबार बिहानबाट सुरु भएको छ ।
बर्दघाट बजारबाट ५ किलोमिटर पूर्वतर्फ खुर्सानी खोलामा ५ दिनअघि निर्माण गरिएको डाइभर्सन सडक बगाएका कारण राजमार्गको यातायात ठप्प भएको थियो । त्यहाँ सडक बगाउँदा तरकारी बोकेको पिकअप भ्यान पनि बगाएको छ ।
फिल्डमा खटिएका ट्राफिक प्रहरीका सई तीर्थ भुसालका अनुसार अहिले बिहान सवा २ बजेदेखि राजमार्गको यातायात ठप्प छ । राजमार्ग खुलाउन त्यहाँ काम भइरहेपनि रातभरिको वर्षातका कारण कठिनाइ भएको छ ।
डाइभर्सन सडक बगाउँदा लु ३ च ८४९३ नम्बरको तरकारी बोकेको पिकअप भ्यानसमेत बगाएको भुसालले जानकारी दिए । भुसालका अनुसार मानवीय क्षति भने भएको छैन ।
