बुलेटिनमा भनिएको छ, ‘भू–उपग्रहबाट प्राप्त बादलका तस्बिर, वायुमण्डलीय तथा मौसम मोडेलबाट प्राप्त तथ्याकंको विश्लेषणको आधारमा यस वर्षको मनसुन यसै साताको अन्त्यसम्ममा नेपालको पूर्वी भूभागबाट प्रवेश हुने सम्भावना देखिएको छ ।’

मौसम पुर्वानुमान बुलेटिन अनुसार आगामी तीन दिन अर्थात बिहिबार बेलुकी र शुक्रबार दिउँसो र राती कोशी, गण्डकी र मधेश प्रदेशका केही स्थानमा भारी बर्षाको प्रक्षेपण गरिएको मौसमविद् ढकालले बताए । उनले भने, ‘बिहिबार बेलुकी कोशी र गण्डकीको हिमाली तथा पहाडी भेगहरुमा र शुक्रबार दिउँसो र राती कोशी र मधेशको केही स्थानमा भारी बर्षा हुने देखिन्छ ।’  

मनसुन सामान्यतः भारतको केरला राज्यमा मे ३१ वा जुन १ (जेठ १७ वा १८ गते) मा केरलामा आइपुग्ने र जुन १३ (जेठ ३०) भित्रमा नेपाल आइपुग्ने गर्छ । यसपाली केरलामा चाडै भित्रिएकाले नेपालमा पनि छिटै प्रवेश हुने आँकलन भैरहेको भएपनि यकिन भन्न नसकिने त्रिभुवन विश्वविद्यालयको जल तथा मौसम केन्द्रीय विभागका सहप्राध्यापक डा.मदन सिग्देल बताउछन् । ‘गतबर्ष बंगालको खाडीबाट आएको मनसुनी जलवास्प बंगलादेशमाथि र भारतको वेष्ट बेंगाल राज्यको सिलगुडीमुनि आएपछि केही दिन अडिएको थियो, मनसुनको सक्रियता र हावाको बहाव तथा नेपालको पनि आफ्नै भौगोलिक बिशिष्टताहरु भएका कारण यति नै समयमा आइपुग्छ भन्न सकिदैन,’ उनले भने, ‘यद्यपी सरदरभन्दा चाडै र औसत भन्दा बढि बर्षात हुने पुर्वानुमान अनुसार पुर्वतयारीमा ध्यान दिनुपर्छ ।’ सामान्यखालका हेलचेक्राईले नै काठमाडौंले डुबान भोगिरहेको हुनाले ढल नालाको सरसफाई गर्नेजस्ता कार्यहरु समुदायस्तरबाट समेत हुनु जरुरी रहेको बताए ।  

गत वर्षको मनसुन तीन दिन चाँडै सुरु भएर १० ढिला बाहिरिँदा राष्ट्रिय विपद् प्राधिकरणको ‘क्षति तथा नोक्सानीको प्रारम्भिक आँकलन’ अनुसार करिब ४६ अर्ब ६८ करोड ४३ लाखभन्दा बढीको क्षति पुगेको थियो । ०८१ जेठ २८ देखि असोज २६ सम्म सक्रिय हुँदा सरदरभन्दा बढी मनसुनी वर्षा भएको थियो । जल तथा मौसम विज्ञान विभागको विश्लेषणअनुसार गत वर्ष ७७ वर्षकै इतिहासमा सबैभन्दा ठूलो पानी परेको थियो ।