काठमाडौँ — प्रेस सेन्टर नेपालले सहिद कृष्ण सेन ‘इच्छुक’को २३औं स्मृति दिवस विभिन्न कार्यक्रम गरेर मनाएको छ । सेन्टरको केन्द्रीय समितिको आयोजना, उपत्यका, प्रतिष्ठान र एशोसियट प्रदेश समितिको सहभागितामा मंगलबार काठमाडौंमा ‘इच्छुक’को स्मृति दिवस मनाइएको हो ।

कार्यक्रमको पहिलो चरणमा सेनको बारेमा प्रेस सेन्टरले तयार पारेको श्रव्य-दृश्य सामग्री प्रसारण गरिएको थियो । दोस्रो चरणमा ‘गणतन्त्र र समाजवादको यात्रा’ र ‘कृष्ण सेन ‘इच्छुक’ र जनपक्षीय पत्रकारिता’बारे पीसीएन संवाद गरिएको प्रेस सेन्टरका महासचिव मनोज घर्तीमगरले विज्ञप्तिमार्फत जानकारी दिए । 

संवादको ‘गणतन्त्र र समाजवादको यात्रा’मा माओवादी केन्द्रकी स्थायी समिति सदस्य, पूर्वसञ्चार तथा सूचना प्रविधिमन्त्री रेखा शर्मा, राष्ट्रिय सभा सदस्य सुरेश आलेमगर, माओवादी केन्द्रका केन्द्रीय सदस्य, पूर्वयुवा तथा खेलकुदमन्त्री दलजित श्रीपाइली, मधेस प्रदेशका प्रदेशसभा सदस्य तथा प्रदेशका पूर्व राज्यमन्त्री रहबर अन्सारी र धादिङको बेनिघाट रोराहाङ गाउँपालिकाका अध्यक्ष कृष्णबहादुर थपलियाले भाग लिए । संवादको सहजीकरण नेपाल पत्रकार महासंघका निवर्तमान महासचिव रोशन पुरीले गरेका थिए ।