काठमाडौँ — कांग्रेस सांसद रामहरि खतिवडाले मन्त्रालय मातहतका कर्मचारीमाथि छानबिन हुँदा गृहमन्त्रीले राजीनामा दिनुपर्छ भन्नु पूर्वाग्रहपूर्ण माग हुने बताएका छन् । भिजिट भिसा प्रकरणमा गृहमन्त्री रमेश लेखकमाथि प्रश्न उठेको र संसद्मा विपक्षी दलहरूले विरोध गरिरहेको अवस्थामा राज्यव्यवस्था तथा सुशासन समिति सभापतिसमेत रहेका खतिवडाको उक्त अभिव्यक्ति आएको हो । 

संघीय संसद् भवन नयाँ बानेश्वरमा मंगलबार सञ्चारकर्मीसँग कुराकानी गर्दै सांसद खतिवडाले कर्मचारीमाथि छानबिन हुँदा मन्त्रीको राजीनामा माग्नु सही नभएको बताए । भिजिट भिसा प्रकरणमा अख्तियार दुरुपयोग अनुसन्धान आयोगले कर्मचारीमाथि छानबिन गरिरहेको पनि बताए । अनुसन्धानबाट दोषी भए जुनसुकै व्यक्तिलाई कारबाहीको दायरमा ल्याउनुपर्ने पनि उनको भनाइ थियो । 

कर्मचारीमाथि अनुसन्धान सुरु भएकै आधारमा गृहमन्त्रीले राजीनामा दिनुपर्छ भन्ने माग उचित नभएको सांसद खतिवडाको भनाइ छ । ‘एउटा कर्मचारीमाथि निष्पक्ष छानबिन हुन दिनुपर्छ । गल्ती भए जुनसुकै तहको मान्छे पनि कारबाहीको दायरामा आउनुपर्छ । तर कसैमाथि अनुसन्धान गर्दैमा गृहमन्त्रीलाई नै राजीनामा दिनुपर्छ भन्नु पूर्वाग्रह हुन्छ । मातहतका कर्मचारीमाथि उजुरी पर्दैमा मन्त्रीहरूले राजीनामा दिँदै जाने ?,' उनले भने, 'अहिले अख्तियारमा प्रत्येक परेका निवेदनमा उजुरी लेख्नको लागि प्रत्येक कार्यालयमा एउटा कर्मचारी लेख्ने व्यवस्थाको सुरुवात भएको छ । एउटा कर्मचारी त उजुरीको जवाफ दिनको लागि मात्र राखिएको छ । अख्तियार संवैधानिक निकाय हो अख्तियारले छानबिन गरिरहेको छ । अनुसन्धानबाट खुलेअनुसार कारबाही हुनुपर्छ । तर यही विषयलाई लिएर गृहमन्त्रीको राजीनामा माग्नु कति युक्तिसंगत होला ?’