काठमाडौँ — सगरमाथा संवाद २०२५ को अन्तिम दिन बिहान २४ जना विदेशी पाहुनाले मउन्टेन फ्लाइट गरेका छन् ।
हिमाल देखाउने उद्देश्यका साथ वन तथा वातावरण मन्त्री ऐन बहादुर शाही ठकुरीको नेतृत्वमा सगरमाथा संवादका लागि नेपाल आएकामध्ये करिब २४ विदेशी पाहुना र केही स्वदेशीहरूले माउन्टेन फ्लाइट गरेका हुन् ।
नेपाल सरकारले उक्त फ्लाइटको आयोजना गरेको थियो । विदेशी पाहुनाहरूले सगरमाथा लगायतका हिमालहरूको अवलोकन गरेका हुन् । सेताम्मे हुने गरेको हिमालहरूमा जलवायु परिवर्तनको असर देखिएको वनमन्त्री शाहीले बताए ।
'नेपालको हिमाल प्रत्यक्ष अनुगमन गराउने निर्णयअनुसार पाहुनाहरुलाई आज हामीले माउन्टेन फ्लाइट लगेका हौं,' उनले भने, 'जहाँ हामीले कुनै हिमाल कालो पहाड र कुनै हिमालमा मात्र हिउँ देख्यौं ।' कालो हिमाल देखिनुको अर्थ यो जलवायु परिवर्तनको असरबाट भएको कुरा अनुभव गराइएको उनको भनाइ छ । यो जलवायु परिवर्तनका कारण विश्व तापमान वृद्धि भइरहेको र सेतो हिमाल कालो भएको उनले बताए ।
'यी कुरा आज विदेशी पाहुनाले देख्नुभयो,' उनले भने, 'यही कुरा संवादमार्फत उठाएका हौं ।' शुक्रबारदेखि सुरु भएको पहिलो संस्करणको सगरमाथा संवाद आइतबार सम्पन्न हुँदैछ । तीन दिने संवादमा नेपालले जलवायु परिवर्तन, पर्वतहरु र मानव भविष्य विषयमा बहस उठाइरहेको छ ।
