कैलाली — पूर्वउपप्रधानमन्त्री तथा राष्ट्रिय जनमोर्चा अध्यक्ष चित्रबहादुर केसीले राजतन्त्र पुन:स्थापनाको प्रयत्नप्रति कडा आपत्ति जनाएका छन् । ‘म प्रत्यक्ष निरंकुश राजतन्त्रको अनुभव गरेको मान्छे हुँ । गणतन्त्र, यद्यपि त्रुटिपूर्ण छ, तर राजतन्त्रभन्दा कयौं गुना राम्रो व्यवस्था हो,' उनले स्पष्ट पारे । 

धनगढीमा वर्तमान राजनीतिक परिस्थिति र गणतन्त्र रक्षाको प्रश्न विषयक अन्तरक्रिया कार्यक्रमलाई सम्बोधन गर्दै उनले नेतृत्वको असफलता र राजनीतिक भ्रष्टाचारले जनतामा मोहभंग भएको स्वीकार गरे । वर्तमान देशको राजनीतिक अवस्था नेतृत्वको नैतिक कमजोरीपनको परिणाम भएको उनको ठहर छ । 'नेतृत्व गर्नेहरू राष्ट्र प्रतिबद्ध, इमानदार र निस्कलंक हुनुपर्ने हो । तर अहिलेको नेतृत्वले त्यो स्तर कायम राख्न सकेन,' केसीले भने ।