धनुषा — कांग्रेसका नेता एवं पूर्वपरराष्ट्रमन्त्री एनपी साउदले कांग्रेस-एमाले दुई तिहाइको मजबुत सरकार भए पनि सोचेअनुसार काम नभएको बताएका छ्न् ।
जलेश्वरमा कार्यकर्ता भेटघाट तथा अन्तरक्रिया कार्यक्रम सम्बोधन गर्दै उनले कांग्रेस र एमालेको गठबन्धनमा बनेको वर्तमान सरकार दुई तिहाइको बलियो सरकार भए पनि जनताले अपेक्षा गरेजस्तो काम गर्न नसकेको टिप्पणी गरे ।
दुई तिहाइको मजबुत सरकार हुँदा पनि अध्यादेशमार्फत कानुन निर्माणको प्रयास गर्नु लोकतान्त्रिक अभ्यासको अपमान हुने उनको भनाइ थियो । 'जनताको प्रत्यक्ष प्रतिनिधित्व रहेको संसदमार्फत विधेयक ल्याएर कानुन निर्माण गर्नु नै संविधानको मर्म हुनेछ,' उनले भने ।
पार्टीभित्रको संगठन सुदृढीकरण, युवा सहभागिता र सामाजिक न्यायमा आधारित समाजवादतर्फ कांग्रेसले नेतृत्व लिनुपर्ने बेला आएको उनले बताए ।
