काठमाडौँ — प्रमुख प्रतिपक्षी माओवादी केन्द्रका सांसद जनार्दन शर्माले नेपालको आर्थिक पुनर्संरचनाको लागि राष्ट्रिय बहस र राष्ट्रिय सहमति आवश्यक रहेको बताएका छन् ।

शर्माले आर्थिक क्षेत्रको पुनर्संरचना गरेर मात्रै आगामी आर्थिक वर्षको बजेट ल्याउन सरकारलाई सुझाव दिएका छन् । उनले बजेटमा चालु खर्च व्यापक रूपमा घटाएर ल्याएमा समर्थन गर्ने पनि बताएका छन् । 

प्रतिनिधिसभाको बुधबारको बैठकमा सरकारको आगामी आर्थिक वर्षको विनियोजन विधेयकका सिद्धान्त र प्राथमिकतामाथिको छलफलमा भाग लिँदै सांसद शर्माले आगामी बजेट आम्दानी र खर्चको फाँटमात्र नभएर देशको समृद्धिको असमानताको खाडलबाट उकासिन नसकेका जनतालाई माथि उठाउने उद्देश्यमुलक दस्तावेजको रुपमा प्रस्तुत हुने अपेक्षा रहेको बताए ।

'बजेट बनाउँदा जनअपेक्षा पूरागर्ने स्रोत हामीसँग छैन । त्यो स्रोत कहाँबाट ल्याउने ? बजेटको ६५ प्रतिशत चालु खर्चमा जाने गरेको छ । १७ प्रतिशत मात्र पुँजीगत खर्च हो, त्यो पनि खर्च हुँदैन । त्यसकारण त्यो ६५ लाई ३५ मा झार्नेगरि ल्याउनुस् हाम्रो समर्थन रहनेछ,' उनले भने, 'राजनीतिक र प्रशासनिक क्षेत्रको खर्च घटाउनुपर्छ । त्यसबाटमात्र बजेट बनाउनसक्नु हुन्छ ।'