काठमाडौँ — शिक्षा मन्त्रालयले दक्षिण कोरियामा अध्ययन गर्न जाने विद्यार्थीहरुको वेदेशिक अध्ययन अनुमति सर्टिफिकेट (एनओसी) वितरणमा रोक लगाएको छ ।

शिक्षा मन्त्रालयले मंगलबार विज्ञप्ति जारी गरेर दक्षिण कोरियाका लागि एनओसी जारी गर्ने कार्य हाललाई स्थगित गरिएको जनाएको छ । दक्षिण कोरियामा अध्ययन गर्न जाने विद्यार्थीले रोजगारीमा बढी प्राथमिकता दिएका कारण अध्ययनमा निरन्तरता नहुने समस्या देखिएको मन्त्रायले जनाएको छ ।

‘पढ्ने समय कम भएका विश्वविद्यालयमा भर्ना हुने, पैसा कमाउने प्राथमिकताका कारण अध्ययनको निरन्तरतामा समस्या आउने, काम पाउने नसक्नेहरुमा मानसिक समस्या तथा डिप्रेसनमा पर्ने, कोरिया सरकारले कालोसूचीमा राखेका विश्वविद्यालयमा समेत विद्यार्थी पउने गरेको समस्स्या देखिएको छ,’ विज्ञप्तिमा भनिएको छ ।

कोरिया अध्ययन गर्न जाने व्यवस्थामा नियमन गर्नुपर्ने आवश्यकता देखिएकाले एनओसी वितरण स्थगित गर्नुपरेको मन्त्रालयले जनाएको छ । यसको नियमन र व्यवस्थित गर्न कार्यदल गठन गरिएको र कार्यदलको सिफारिसको आधारमा थप निर्णय गर्ने गरी हाललाई एनओसी रोकिएको शिक्षा मन्त्रालयले जनाएको छ ।