पाँचथर — माओवादी केन्द्रका अध्यक्ष पुष्पकमल दाहालले  वर्तमान सरकार रुझेको बिरालो झैं शक्तिहीन भइसकेको टिप्पणी गरेका छन् । सरकारको आवरणमा पहिलो र दोस्रो दल कांग्रेस र एमाले रहे पनि सरकार चलाउने पर्दा पछाडि अरु थुप्रै स्वार्थ केन्द्र सक्रिय रहेको उनको भनाइ छ । 

माओवादी केन्द्रले शनिबार पाँचथरको फिदिममा आयोजना गरेको जनसभालाई सम्बोधन गर्दै उनले सरकारले मुलुक र जनताका पक्षमा काम गर्न नसकेको बताए । उनले अब सरकारको आयु पनि पूरा हुनै लागेको उनले दाबी गरे ।

‘मेरो नेतृत्वको सरकारले देश र जनताका पक्षमा धेरै राम्रा काम थालनी गरेको थियो, भ्रष्टाचार र सुशासनका लागि नीतिगत पहल पनि भइरहेकै थियो, दलाल बिचौलिया र पुँजीपतिलाई त्यो सैहृय भएन, स्वार्थ केन्द्रहरुले बनाएको यो सरकार जनहितमा काम गर्न नसकेर रुझेको बिरालो जस्तै भइसकेको छ, आफैं ढल्छ, हामीले ढालिरहनु पर्दैन,’ उनले भने ।

२०६४ सालमा जनताले विश्वास गरेर माओवादीलाई बहुमत दिएको स्मरण गर्दै उनले आफ्नो नेतृत्वमा रहेको पार्टीले इतिहासका कालखण्डमा जानी-नजानी गरेका त्रुटिका कारण पुनःजनताको विश्वास गुमाएको स्विकारे । ‘सायद जनमतको कदर हुन सकेन, त्यही भएर जनताले हामीलाई पनि कांग्रेस एमालेजस्तै देख्न थाले, कांग्रेस एमालेलाई पहिलो दल बनाउन हामीले पालै पालो बैशाखी बन्यौ, उनीहरु सधैं हामीलाई सिध्याउन लागि परिरहे, अहिले हामीलाई हिमाल पहाड तराईका जनताको दर्बिलो साथ छ, २०८४ मा कसैको बैशाखी नटेकी पहिलो दलका रुपमा स्थापित हुन्छौं,’ उनको दाबी थियो ।