काठमाडौँ — नेकपा (एकीकृत समाजवादी) का सांसद प्रकाश ज्वालाले सिंहदरबारको गेटमा देखिने अवस्थालाई कुशासनको एउटा जिउँदो नमुना बताएका छन्।
बुधबार बसेको प्रतिनिधिसभाको बैठकमा सांसद ज्वालाले देशमा अनियमितता, बेथिति र कुशासन व्याप्त रहेको उल्लेख गर्दै, सिंहदरबारको गेटमा देखिने जनताको भीड र लाइन त्यस्तो अवस्थाको प्रमाण भएको धारणा राखेका हुन्।
उनले सिंहदरबारभित्र मन्त्रालयहरू थुपारेर चारैतिर पर्खाल र फलामे गेटले घेरेर जेलजस्तो बनाइएर जनतालाई प्रवेश निषेध गरिएकोप्रति आपत्ति जनाएका छन् । गेट पास प्राप्त गर्न नागरिकहरूलाई चर्को घाममा पसिना चुहाउँदै लामो समय तड्पिनुपर्ने अवस्था रहेको र त्यसको अन्त्य गरिनुपर्ने माग गरे ।
सांसद ज्वालाले सरकारी कार्यालयहरूमा ढिलासुस्ती र खुलेआम घूस खोरी बढिरहेको बताउँदै प्रधानमन्त्री तथा मन्त्रीहरूको सम्पत्ति विवरण सार्वजनिक नगरी सरकारले पारदर्शिता कायम गर्न खोजेको दाबीको औचित्यमाथि प्रश्न उठाएका छन्। साथै, प्रधानमन्त्री र मन्त्रीहरूको सम्पत्ति विवरण तत्काल सार्वजनिक गर्नुपर्ने माग राखेका छन् ।
उनले सिंहदरबारको दक्षिण गेटमा मन्त्री, सांसद तथा कर्मचारी सहज रूपमा प्रवेश गर्ने तर जनता भने घाममा उभिएर पासका लागि पर्खिनुपर्ने अवस्था अस्वीकार्य भएको बताउँदै त्यतातिर सरकारले ध्यान दिनुपर्ने बताए ।
