काठमाडौँ — माओवादी केन्द्रका अध्यक्ष पुष्पकमल दाहालले सरकारले प्रस्तुत गरेको आगामी आर्थिक वर्षको नीति तथा कार्यक्रम जनभावनाअनुसार नभई औपचारिकता मात्र पूरा गर्न ल्याइएको टिप्पणी गरेका छन्।

सोमबार संसद् भवन परिसरमा सञ्चारकर्मीहरूसँग कुरा गर्दै दाहालले यस्तो टिप्पणी गरेका हुन्। उनका अनुसार सरकारले जनभावना र राष्ट्रको आवश्यकताअनुसार नीति तथा कार्यक्रम ल्याउन सकेको छैन। उनले देशका विभिन्न भागमा जनतासँग संवाद गर्दा उठेका आवश्यकतालाई प्राथमिकतामा राखेर धारणा बनाएको दाबी गरे।

उनले नीति तथा कार्यक्रम सिर्जनात्मक, रचनात्मक र जनता तथा राष्ट्रको पक्षमा नभई, गत वर्षको नीति तथा कार्यक्रमहरू कपिपेस्ट गरेर झारा टार्ने शैलीमा आएको आरोप लगाए।

दाहालले भने, ‘हामीले पूर्वदेखि पश्चिमसम्म जनतासँग जे संवाद गरियो र जनभावना जे बुझेँ, त्यसैको आधारमा धारणा राखेको हुँ। यो नीति तथा कार्यक्रम झारा टार्ने र औपचारिकता मात्र पूरा गर्ने खालको हो। गत वर्षको नीति तथा कार्यक्रम कपिपेस्ट गर्नु पनि झारा टार्नु नै हो। किनभने एक वर्षको अवधिमा धेरै विकास भइसकेको छ। नयाँ सिर्जनात्मक, रचनात्मक र जनता तथा राष्ट्रको पक्षमा कुनै कुरा छैन।’