काठमाडौँ — भारतको ओडिसास्थित कलिंग इन्स्टिच्युट अफ इन्डस्ट्रियल टेक्नोलोजी (केआईआईटी) मा भएको नेपाली विद्यार्थीको मृत्यु घटनामा भारतीय विदेश मन्त्रालयले शोक व्यक्त गर्दै प्रहरीले गम्भीर भएर अनुसन्धान गरिरहेको जनाएको छ ।

केआईआईटीमा नेपाली विद्यार्थीको निधनबाट गहिरो दु:ख व्यक्त गर्दै मन्त्रालयले यो कठिन समयमा शोकाकुल परिवारप्रति समवेदना व्यक्त गरेको छ । 

घटनाबारे जानकारी प्राप्त भएदेखि नै ओडिसा राज्य सरकारसँग निरन्तर सम्पर्कमा रहेको मन्त्रालयले विज्ञप्तिमा उल्लेख गरेको छ । ओडिसा राज्य सरकारले मृतकका परिवारसँग समन्वय गरिरहेको र प्रहरीले घटनामा जाँच गरिरहेको पनि मन्त्रालयको भनाइ छ ।

भारत सरकारले अन्तर्राष्ट्रिय विद्यार्थीको सुरक्षा, संरक्षण र हितलाई अत्यन्त गम्भीरतापूर्वक लिएको भन्दै विदेश मन्त्रालयले नेपाली अधिकारी, ओडिसा राज्य सरकार र व्यवस्थापनसँग निरन्तर सम्पर्कमा रहेको जनाएको छ । घटनाका सम्बन्धमा समयमै सञ्चार-समन्वय पनि भइरहेको उल्लेख गरेको छ ।